ທ່ານ ສີຈິ້ນຜິງ ສົ່ງໂທລະເລກຊົມເຊີຍເຖິງປະທານາທິບໍດີອານເຊຣີຕໍ່ຜົນສຳເລັດຂອງການຍິງດາວທຽມໂທລະຄົມເລກ 1
ວັນທີ 11 ທັນວານີ້, ທ່ານ ສີຈິ້ນຜິງ ປະທານປະເທດຈີນໄດ້ສົ່ງໂທລະເລກຫາທ່ານ ອັບເດລາຊິສ໌ ບຸນຕີຟລີຄາ ປະທານາທິບໍດີອານເຊຣີ ເພື່ອຊົມເຊີຍຕໍ່ຜົນສຳເລັດຂອງການຍິງດາວທຽມໂທລະຄົມເລກ 1 ຂອງປະເທດອານເຊຣີ.
ທ່ານ ສີຈິ້ນຜິງ ກ່າວໃນເນື້ອໃນໂທລະເລກວ່າ: ໂຄງການດາວທຽມໂທລະຄົມເລກ 1 ຂອງອານເຊຣີເປັນການສ່ອງແສງໃຫ້ເຫັນເຖິງການພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນ-ອານເຊຣີ ທັງເປັນແບບຢ່າງແຫ່ງຜົນສຳເລັດດ້ານການຮ່ວມມືລະຫວ່າງຈີນ-ປະເທດອາຣັບໃນຂົງເຂດການບິນອະວະກາດ, ເຊິ່ງມັນຈະມີບົດບາດທີ່ສຳຄັນຕໍ່ການຊຸກຍູ້ການພັດທະນາເສດຖະກິດ, ປັບປຸງສະພາບຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະຊຸກຍູ້ຄວາມກ້າວໜ້າດ້ານສັງຄົມແກ່ອານເຊຣີ.
ທ່ານ ບຸນຕີຟລີຄາ ກ່າວວ່າ: ຜົນສຳເລັດຂອງການຍິງດາວທຽມໂທລະຄົມເລກ 1 ຂອງປະເທດອານເຊຣີແມ່ນຜົນສຳເລັດທີ່ສຳຄັນແລະໃຫຍ່ຫຼວງລະຫວ່າງສອງປະເທດໃນດ້ານການຮ່ວມມືການບິນອະວະກາດ ເຊິ່ງໄດ້ສ່ອງແສງໃຫ້ເຫັນເຖິງມິດຕະພາບອັນເປັນມູນເຊື້ອທີ່ດີລະຫວ່າງສອງປະເທດ. ຝ່າຍອານເຊຣີຍິນດີຮ່ວມກັບຝ່າຍຈີນພ້ອມກັນຊຸກຍູ້ການຮ່ວມມືໃນຂົງເຂດຕ່າງໆເພື່ອໃຫ້ໄດ້ຮັບໝາກຜົນຫຼາຍກວ່າເກົ່າ.
ດາວທຽມໂທລະຄົມເລກ 1 ຂອງອານເຊຣີແມ່ນດາວທຽມໂທລະຄົມທີ່ສະຖາບັນຄົ້ນຄວ້າເຕັກນິກອະວະກາດຈີນຜະລິດໃຫ້ກົມການບິນອະວະກາດອານເຊຣີ, ແມ່ນດາວທຽມໂທລະຄົມໜ່ວຍທຳອິດຂອງອານເຊຣີ ທັງເປັນໂຄງການຮ່ວມມືໂຄງການທຳອິດລະຫວ່າງສອງປະເທດໃນຂົງເຂດການບິນອະວະກາດ.