ວັນທີ 11 ທັນວານີ້, ເຈົ້າໜ້າທີ່ໃນທຳນຽບປະທານາທິບໍດີຟີລິບປິນກ່າວວ່າ: ທ່ານ ໂຣດຣີໂກ ດູເຕີເຕ ປະທານາທິບໍດີຟີລິບປິນໄດ້ສົ່ງຈົດໝາຍໄປຍັງສະພາແຫ່ງຊາດ ໂດຍຮຽກຮ້ອງໃຫ້ແກ່ຍາວເວລາຂອງການປະຕິບັດຄຳສັ່ງພາວະສຸກເສີນຢູ່ເກາະມິນດານາວ ແລະແຫ່ງອື່ນໆທາງພາກໃຕ້ປະເທດຕົນທີ່ຈະໝົດອາຍຸໃນທ້າຍປີນີ້ອອກໄປອີກເປັນເວລາ 1 ປີ ເພື່ອກຳຈັດກຸ່ມປະກອບອາວຸດຕໍ່ຕ້ານລັດຖະບານ ແລະຜູ້ກໍ່ການຮ້າຍຈຳນວນໜຶ່ງທີ່ຍັງເຄື່ອນໄຫວເລື້ອຍໆຢູ່ພາກໃຕ້ຟີລິບປິນ.
ຈົດໝາຍຂຽນວ່າ: ໃນເດືອນຕຸລາປີນີ້, ກອງທັບຟີລິບປິນໄດ້ຍາດເອົາເມືອງມາລາວີທາງພາກໃຕ້ຟີລິບປິນຄືນຈາກກຸ່ມມູເຕີແລະຜູ້ກໍ່ການຮ້າຍອື່ນໆຢ່າງສຳເລັດຜົນ, ແຕ່ຢູ່ເກາະມິນດານາວຍັງມີຜູ້ກໍ່ການຮ້າຍທ້ອງຖິ່ນແລະສັນຊາດຕ່າງປະເທດທີ່ໄດ້ຮັບການສະໜັບສະໜູນຈາກກຸ່ມຫົວຮຸນແຮງ IS, ເຂົາເຈົ້າພວມຂະຫຍາຍສະມາຊິກຄືນໃໝ່, ຊອກຫາການສະໜັບສະໜູນດ້ານທຶນຮອນແລະພະລາທິການ, ແລະເຈດຕະນາກໍ່ການໂຈມຕີຢູ່ພາກໃຕ້ອີກ. ຫາກອະນຸຍາດແກ່ຍາວເວລາພາວະສຸກເສີນໄປຈົນຮອດທ້າຍປີ 2018 ຈະສາມາດຊ່ວຍກອງທັບຟີລິບປິນກຳຈັດກຸ່ມປະກອບອາວຸດຕໍ່ຕ້ານລັດຖະບານທີ່ກໍ່ການໂຈມຕີເລື້ອຍໆຢູ່ພາກໃຕ້ປະເທດຕົນໄດ້.
 |
