ວັນທີ 12 ທັນວານີ້, ທ່ານໂດນັນ ທຣຳ ປະທານາທິບໍດີອາເມລິກາໄດ້ລົງນາມໃນຍັດຕິມອບສິດເບີກງົບປະມານປ້ອງກັນປະເທດສົກການເງິນ 2018 ປະມານ 700 ຕື້ໂດລາ ເຊິ່ງຍັດຕິດັ່ງກ່າວໄດ້ຖືກຮັບຮອງໃນສະພາແຫ່ງຊາດອາເມລິກາໃນເດືອນພະຈິກຜ່ານມານີ້ ແລະ ເປັນຍັດຕິມອບສິດເບີກງົບປະມານປ້ອງກັນປະເທດທີ່ມີຈຳນວນເງິນຫຼາຍທີ່ສຸດເທົ່າທີ່ເຄີຍຮັບຮອງໃນສະພາແຫ່ງຊາດອາເມລິກາ ນັບແຕ່ສົງຄາມອັບການິດສະຖານ ແລະ ອີຣັກເປັນຕົ້ນມາ.
ອີງຕາມຍັດຕິດັ່ງກ່າວ, ຍອດງົບປະມານລາຍຈ່າຍດ້ານວຽກງານປ້ອງກັນປະເທດຂອງອາເມລິກາໃນສົກການເງິນ 2018 ຈະມີປະມານ700 ຕື້ໂດລາ, ຫຼາຍກວ່າຍອດງົບປະມານຂອງປີ 2017 ທີ່ມີຈຳນວນ 619 ຕື້ໂດລາ ເຊິ່ງເກີນຈຳນວນທີ່ລະບຸໃນຂໍ້ກຳນົດ "ຫຼຸດຂຸມການເງິນຢ່າງອັດຕະໂນມັດ" ທີ່ລະບຸໄວ້ໃນຍັດຕິຄວບຄຸມງົບປະມານປີ 2011. ສະນັ້ນ, ກ່ອນຈະເບີກງົບປະມານດັ່ງກ່າວ, ສະພາແຫ່ງຊາດອາເມລິກາຕ້ອງຊອກວິທີຍົກເລີກຄວາມຈຳກັດດັ່ງກ່າວ.