ວັນທີ 13 ທັນວານີ້ເປັນວັນຄົບຮອບ 80 ປີຂອງການເກີດເຫດການສັງຫານໝູ່ນານກິ່ງທີ່ພວກທະຫານຟາຊິດຍີ່ປຸ່ນຜູ້ຮຸກຮານຈີນກໍ່ຂຶ້ນໃນສະໄໝສົງຄາມໂລກຄັ້ງທີສອງ, ປີນີ້ເປັນປີທີ 4 ຕັ້ງແຕ່ໄດ້ກຳນົດໃຫ້ວັນນີ້ເປັນວັນໄວ້ອາໄລແຫ່ງຊາດເພື່ອລະນຶກເຖິງຜູ້ເສຍຊີວິດຈາກເຫດການສັງຫານໝູ່ນານກິ່ງ. ໃນວັນດຽວກັນນີ້, ອົງການຈັດຕັ້ງສັງຄົມຍີ່ປຸ່ນທີ່ຄັດຄ້ານສົງຄາມກໍໄດ້ເປັນເຈົ້າພາບຈັດກິດຈະກຳລະນຶກວັນເກີດເຫດການສັງຫານໝູ່ນານກິ່ງຢູ່ນະຄອນຫຼວງໂຕກຽວປະເທດຍີ່ປຸ່ນ ມີປະຊາຊົນຍີ່ປຸ່ນເກືອບ 200 ຄົນເຂົ້າຮ່ວມ.
ນາງລູ້ຫຼິງ ລູກສາວຂອງນາງຫຼີຊິ້ວຢິ່ງ ຜູ້ລອດຊີວິດຈາກເຫດການສັງຫານໝູ່ນານກິ່ງກໍໄດ້ເດີນທາງໄປເຂົ້າຮ່ວມກິດຈະກຳດັ່ງກ່າວໂດຍໄດ້ບອກເລົ່າກ່ຽວກັບປະສົບການການຖືກເຄາະຮ້າຍຂອງແມ່ຕົນໃຫ້ປະຊາຊົນຍີ່ປຸ່ນຊາບ ເພື່ອເຜີຍແບຄວາມໂຫດຮ້າຍປ່າເຖື່ອນຂອງກອງທະຫານຍີ່ປຸ່ນຮຸກຮານຈີນ. ທ່ານເມີ້ງໂກວສຽງ ຮອງປະທານສະຖາບັນຄົ້ນຄວ້າປະຫວັດສາດກ່ຽວກັບກອງທະຫານຍີ່ປຸ່ນຜູ້ຮຸກຮານຈີນກໍ່ເຫດສັງຫານໝູ່ນານກິ່ງ, ສາສະດາຈານມະຫາວິທະຍາໄລແພດສາດນານກິ່ງກໍໄດ້ເຂົ້າຮ່ວມກິດຈະກຳດັ່ງກ່າວໃນຖານະເປັນແຂກຖືກເຊີນ. ປະຊາຊົນຍີ່ປຸ່ນຫຼາຍໆຄົນທີ່ມາເຂົ້າຮ່ວມກິດຈະກຳຕ່າງກໍຢືນຢັນວ່າ ເມື່ອຟັງການບັນຍາຍຂອງທ່ານນາງລູ້ຫຼິງແລະທ່ານເມີ້ງໂກວສຽງແລ້ວຮູ້ສຶກຕື່ນຕົກໃຈຫຼາຍ. ທ່ານນາງຜູ້ໜຶ່ງກ່າວວ່າ: "ປະສົບການຂອງຜູ້ຖືກເຄາະຮ້າຍຈາກເຫດການສັງຫານໝູ່ນານກິ່ງເຮັດໃຫ້ຕົນຮູ້ສຶກສະເທືອນໃຈຫຼາຍ ແລະຫວັງວ່າຜ່ານຈາກການລະນຶກເຖິງປະຫວັດສາດຕອນນີ້ມັນຈະເປັນສິ່ງຍູ້ດັນການສ້າງອະນາຄົດທີ່ມີແຕ່ສັນຕິພາບຫຼາຍຂຶ້ນກວ່າເກົ່າ".
 |
