ວັນທີ 13 ທັນວານີ້, ຢູ່ຫໍຮັບແຂກເມືອງ "ຕ້ຽວອີທາຍ", ທ່ານ ຈ່າງກ່າວລີ້ ຮອງນາຍົກລັດຖະມົນຕີຈີນກັບທ່ານ ມູນເຈອິນ ປະທານາທິບໍດີ ສ.ເກົາຫຼີ ທີ່ມາຢ້ຽມຢາມຈີນທາງລັດຖະກິດໄດ້ເຂົ້າຮ່ວມກອງປະຊຸມເວທີປຶກສາຫາລືການຄ້າຈີນ-ສ.ເກົາຫຼີ.
ທ່ານ ຈ່າງກ່າວລີ້ ກ່າວເນັ້ນວ່າ: ການພົວພັນທີ່ດີລະຫວ່າງຈີນ-ສ.ເກົາຫຼີສອດຄ່ອງກັບທ່າຂະຫຍາຍທາງປະຫວັດສາດ ແລະຍຸກສະໄໝ, ສອງປະເທດຮ່ວມກັນສະແຫວງຫາການພັດທະນາມີຜົນດີຕໍ່ການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ຂະນະທີ່ການພົວພັນລະຫວ່າງສອງປະເທດໃນປັດຈຸບັນໄດ້ຢູ່ໃນໄລຍະທີ່ສຳຄັນ, ສອງຝ່າຍຄວນເພີ່ມທະວີການເຊື່ອມຕໍ່ທາງການພັດທະນາຍຸດທະສາດ, ເພີ່ມທະວີການຮ່ວມມືດ້ານເສດຖະກິດ-ການຄ້າ, ການແລກປ່ຽນດ້ານວັດທະນະທຳແລະການຮ່ວມມືສາກົນ ເພື່ອຮ່ວມກັນເປີດສະພາບໃໝ່ແຫ່ງການພົວພັນ ການຮ່ວມມືທີ່ມີໄມຕີຈິດມິດຕະພາບ.
ທ່ານ ມູນເຈອິນ ກ່າວວ່າ: ມື້ນີ້ແມ່ນວັນໄວ້ອາໄລແຫ່ງຊາດເພື່ອລະລຶກເຖິງຜູ້ເສຍຊີວິດໃນເຫດການສັງຫານໝູ່ນານກິ່ງທີ່ເກີດຂຶ້ນຄົບຮອບ 80 ປີ, ຝ່າຍ ສ.ເກົາຫຼີ ເອງກໍຮູ້ສຶກສະເທືອນໃຈບໍ່ຕ່າງຫຍັງກັບປະຊາຊົນຈີນ. ໃນໄລຍະທີ່ຜ່ານມາ, ການພົວພັນລະຫວ່າງສອງປະເທດໄດ້ປະສົບບັນຫາໄລຍະໜຶ່ງ, ຫວັງວ່າຜ່ານຈາກການຢ້ຽມຢາມຄັ້ງນີ້ຈະສາມາດຊ່ວຍສ້າງມິດຕະພາບແລະຟື້ນຟູຄວາມໄວ້ເນື້ອເຊື່ອໃຈລະຫວ່າງສອງປະເທດຄືນໃໝ່,ທັງຊ່ວຍເພີ່ມທະວີໃຫ້ມີການຮ່ວມມືໃນຂົງເຂດຕ່າງໆຮ່ວມກັນຕື່ມອີກ.
 |
