ວັນທີ 13 ທັນວານີ້, ທ່ານ ອຶງໄນອູ ຫົວໜ້າກົມຄຸ້ມຄອງບໍລິສັດແລະການລົງທຶນມຽນມາໄດ້ກ່າວຢູ່ເມືອງຢາງກຸ້ງວ່າ: ມຽນມາຈະເລີ່ມປະຕິບັດກົດໝາຍວ່າດ້ວຍບໍລິສັດສະບັບໃໝ່ແຕ່ວັນທີ 1 ສິງຫາປີ 2018 ເປັນຕົ້ນໄປ.
ທ່ານ ອຶງໄນອູ ກ່າວໃນການຖະແຫຼງຂ່າວທີ່ຈັດຂຶ້ນໃນມື້ດັ່ງກ່າວວ່າ: ບົດບັນຍັດເພີ່ມເຕີມຂອງກົດໝາຍວ່າດ້ວຍບໍລິສັດສະບັບໃໝ່ ແລະ ປຶ້ມຄູ່ມືກ່ຽວກັບການຈົດທະບຽນທາງອິນເຕີເນັດ ແລະວຽກງານອື່ນໆທີ່ກ່ຽວຂ້ອງຈະເຮັດສຳເລັດໃນທ້າຍເດືອນກໍລະກົດປີໜ້າ. ຂະນະທີ່ທ່ານ ທິນຈໍ ປະທານາທິບໍດີປະເທດຕົນກໍໄດ້ອະນຸມັດກົດໝາຍດັ່ງກ່າວແລ້ວໃນຫວ່າງມໍ່ໆນີ້.
ຂ່າວແຈ້ງວ່າ: ກົດໝາຍສະບັບໃໝ່ໄດ້ສະເໜີຫຼັກການຄຸ້ມຄອງການດຳເນີນງານຂອງບໍລິສັດ ໄດ້ຍົກເລີກມາດຕາທີ່ບໍ່ສອດຄ່ອງກັບສະພາບໃນປັດຈຸບັນຈຳນວນໜຶ່ງກ່ຽວກັບການໂອນຫຸ້ນສ່ວນ, ແລະຈະເລີ່ມນຳໃຊ້ລະບົບຈົດທະບຽນທາງອິນເຕີເນັດ,ນອກນີ້ຍັງອະນຸຍາດໃຫ້ນັກລົງທຶນຕ່າງປະເທດຖືຫຸ້ນສ່ວນວິສາຫະກິດທ້ອງຖິ່ນໄດ້ໃນອັດຕາສ່ວນໃດໜຶ່ງ.