ວັນທີ 13 ທັນວານີ້, ໃນເວລາທີ່ທ່ານຮຸນເຊັນ ນາຍົກລັດຖະມົນຕີກຳປູເຈຍໄປຢື້ຢາມຖາມຂ່າວກຳມະກອນ 15.000 ຄົນຂອງນະຄອນຫຼວງພະນົມເປັນ, ທ່ານກ່າວວ່າ, ລັດຖະບານລາຊະອານາຈັກກຳປູເຈຍມີທຶນຮອນທີ່ພຽງພໍ ເພື່ອດຳເນີນການເລືອກຕັ້ງໃນປີໜ້າ, ຜົນການເລືອກຕັ້ງບໍ່ຕ້ອງການມີການຮັບຮອງຈາກຜູ້ນຳປະເທດອື່ນໃດຕື່ມອີກ, ມີແຕ່ປະຕິບັດພາຍໃຕ້ລັດຖະທຳມະນູນຂອງກຳປູເຈຍກໍພໍແລ້ວ.
ພາຍຫຼັງສານຂັ້ນສູງກຳປູເຈຍຕັດສິນຍຸບອະດີດພັກກູ້ຊາດກຳປູເຈຍແລ້ວ, ວັນທີ 12 ທັນວານີ້, ສະຫະພາບເອີລົບປະກາດເຊົາໃຫ້ການຊ່ວຍເຫຼືອຕໍ່ການເລືອກຕັ້ງໃນປີ 2018 ຂອງລາຊະອານາຈັກກຳປູເຈຍ. ທ່ານຮຸນເຊັນຕອບວ່າ, ລັດຖະບານກຳປູເຈຍມີທຶນຮອນທີ່ພຽງພໍ ເພື່ອຈັດການເລືອກຕັ້ງໃນປີໜ້າ. ການເລືອກຕັ້ງດັ່ງກ່າວຈະຈັດຂຶ້ນຕາມເວລາກຳນົດ ແລະ ຈະມີຫຼາຍພັກເຂົ້າຮ່ວມການເລືອກຕັ້ງ.
ທ່ານຮຸນເຊັນກ່າວຕື່ມວ່າ, ທຸກປະເທດລ້ວນແຕ່ມີກົດໝາຍຂອງຕົນ, ກຳປູເຈຍເປັນປະເທດປົກຄອງປະເທດດ້ວຍກົດໝາຍແບບປະຊາທິປະໄຕ ທີ່ມີຫຼາຍພັກການເມືອງ. ອະດີດພັກກູ້ຊາດຖືກສານຂັ້ນສູງຕັດສິນຍຸບ ຈະບໍ່ມີຜົນກະທົບຕໍ່ຂະບວນການປະຊາທິປະໄຕຂອງກຳປູເຈຍ ແລະ ຈະບໍ່ກະທົບເຖິງການເລືອກຕັ້ງຂອງກຳປູເຈຍໃນພາຍໜ້າ.