ທ່ານມາວເຊິ້ງຢົງ ໂຄສົກຖະແຫຼງຂ່າວກົມສະຖິຕິແຫ່ງຊາດຈີນໄດ້ເປີດເຜີຍໃນພິທີຖະແຫຼງຂ່າວທີ່ຈັດຂຶ້ນໃນວັນທີ 14 ທັນວານີ້ວ່າ, ເສດຖະກິດແຫ່ງຊາດຈີນໃນເດືອນພະຈິກປີນີ້ສືບຕໍ່ພັດທະນາຢ່າງໜັກແໜ້ນ ແລະ ມີທ່ວງທ່າດີຂຶ້ນກວ່າເກົ່າ, ຄວາມຕ້ອງການດ້ານການຜະລິດເພີ່ມຂຶ້ນຢ່າງໜັກແໜ້ນ, ການປະກອບອາຊີບ ແລະ ລາຄາສິນຄ້າໃນຕະຫຼາດມີສະຖຽນລະພາບດີ, ໂຄງປະກອບເສດຖະກິດໄດ້ຮັບການປັບປຸງດີຂຶ້ນເລື້ອຍໆ, ຄຸນນະພາບ ແລະ ປະສິດທິພາບຂອງເສດຖະກິດກໍດີຂຶ້ນຢ່າງຕໍ່ເນື່ອງ.
ເຈົ້າໜ້າທີ່ຜູ້ທ່ານຍັງເປີດເຜີຍຂໍ້ມູນອີກວ່າ, ການຜະລິດດ້ານອຸດສາຫະກຳເຕີບໂຕຢ່າງໜັກແໜ້ນ, ມູນຄ່າເພີ່ມຂອງອຸດສາຫະກຳຂະໜາດໃຫຍ່ໃນທົ່ວປະເທດໃນເດືອນພະຈິກຜ່ານມານີ້ເພີ່ມຂຶ້ນຕົວຈິງ 6,1% ເຊິ່ງຕ່ຳກວ່າເດືອນຕຸລາ 0,1%. ຂະແໜງການບໍລິການເພີ່ມຂຶ້ນຂ້ອນຂ້າງໄວ, ດັດສະນີການຜະລິດໃນຂະແໜງການບໍລິການໃນທົ່ວປະເທດໃນເດືອນພະຈິກໄດ້ເພີ່ມຂຶ້ນ 7,8% ແລະ ຕ່ຳກວ່າເດືອນຕຸລາ 0,2%.
ຕົວເລກຍັງສະແດງໃຫ້ເຫັນວ່າ, ຍອດມູນຄ່າຂາຍຍ່ອຍເຄື່ອງອຸປະໂພກບໍລິໂພກໃນສັງຄົມໃນເດືອນພະຈິກໄດ້ເພີ່ມຂຶ້ນ 10,2% ແລະ ສູງກວ່າເດືອນຕຸລາ 0,2%.
 |
