ທ່ານແວນດາ ຕູນໂຟຕິໂອ ລັດຖະມົນຕີກະຊວງທ່ອງທ່ຽວຟີລິບປິນຢືນຢັນໃນວັນທີ 13 ທັນວານີ້ວ່າ: ມາຮອດວັນທີ 12 ທັນວານີ້, ມີນັກທ່ອງທ່ຽວຈີນມາທ່ຽວຟີລິບປິນແລ້ວ 910.000 ເທື່ອຄົນ ເຊິ່ງສາມາດຄາດຄະເນໄດ້ວ່າ ຍອດນັກທ່ອງທ່ຽວມາທ່ຽວຟີລິບປິນໃນປີ 2017 ນີ້ຈະກາຍ 1 ລ້ານເທື່ອຄົນ ເພີ່ມຂຶ້ນ 100% ເມື່ອທຽບໃສ່ປີຜ່ານມາ, ຈຳນວນນັກທ່ອງທ່ຽວຈີນທີ່ເຂົ້າມາທ່ອງທ່ຽວຟີລິບປິນຫຼາຍເປັນອັນດັບທີ 2 ຖັດຈາກ ສ ເກົາຫຼີ. ກະຊວງທ່ອງທ່ຽວຟີລິບປິນຫວັງວ່າຍອດນັກທ່ອງທ່ຽວເດີນທາງມາທ່ຽວປະເທດຕົນຈະບັນລຸເຖິງ 2 ລ້ານເທື່ອຄົນໃນປີ 2018.
ທ່ານແວນດາ ຕິໂອຢືນຢັນວ່າ ຟີລິບປິນພ້ອມແລ້ວທີ່ຈະຕ້ອນຮັບນັກທ່ອງທ່ຽວຈີນຈຳນວນຫຼວງຫຼາຍເຂົ້າມາທ່ອງທ່ຽວ.
ໄປພ້ອມໆກັບຈຳນວນນັກທ່ອງທ່ຽວຈີນເພີ່ມຂຶ້ນຢ່າງຫຼວງຫຼາຍ, ກົມຄຸ້ມຄອງຄົນເຂົ້າເມືອງຟີລິບປິນໄດ້ເພີ່ມພະນັກງານຜູ້ຮູ້ພາສາຈີນຢູ່ດ່ານກວດກາທີ່ສະໜາມບິນ ແລະຝ່າຍກົມຄຸ້ມຄອງຄົນເຂົ້າເມືອງຟີລິບປິນໄດ້ວາງແຜນເປີດການສອນພາສາຈີນໃຫ້ພະນັກງານດ່ານກວດກາຢູ່ທ່າກຳປັ່ນໃນປີໜ້າ. ພ້ອມກັນນັ້ນຍັງໄດ້ປັບປຸງໃຫ້ຂັ້ນຕອນການກວດກາຄົນເຂົ້າເມືອງມີຄວາມສະດວກແລະວ່ອງໄວຂຶ້ນກວ່າເກົ່າ.