ງານວາງສະແດງສິນຄ້າຈີນ-ອີຣານຄັ້ງທຳອິດໄດ້ຈັດຂຶ້ນຢູ່ນະຄອນຫຼວງເຕເຮຣານປະເທດອີຣານໃນວັນທີ 14 ທັນວານີ້ ໂດຍມີວິສາຫະກິດຈີນ 351 ແຫ່ງເຂົ້າຮ່ວມ. ຄາດວ່າ ງານວາງສະແດງທີ່ຈະດຳເນີນເປັນເວລາ 3 ວັນຈະສາມາດດຶງດູດນັກທຸລະກິດຝ່າຍຈັດຊື້ທ້ອງຖິ່ນ 1 ພັນກວ່າແຫ່ງເຂົ້າໄປຊົມ ແລະ ຫາລືກ່ຽວກັບການຮ່ວມມືດ້ານເສດຖະກິດ-ການຄ້າ.
ຝ່າຍຈັດງານໃຫ້ຮູ້ວ່າ: ງານດັ່ງກ່າວໄດ້ຕັ້ງໃຫ້ມີ 2 ຂົງເຂດສິນຄ້າວາງສະແດງຫຼັກຄື: ສິນຄ້າເຄື່ອງໃຊ້ໃນເຮືອນ ແລະສິນຄ້າອຸດສາຫະກຳ, ໄດ້ມີເຂດວາງສະແດງ 9 ເຂດໃຫຍ່. ມີວິສາຫະກິດທີ່ເຂົ້າມາຮ່ວມ 351 ແຫ່ງຈາກແຂວງເຈີ້ຈ່ຽງ, ນະຄອນຊຽງໄຮ, ແຂວງຈ່ຽງຊູ່, ແຂວງກວາງຕຸ້ງ, ແຂວງຊ່ານຕຸ່ງ ແລະແຂວງອື່ນໆຂອງຈີນ. ມີຮ້ານວາງສະແດງ 705 ຮ້ານ, ເນື້ອທີ່ລວມຂອງການວາງສະແດງມີເຖິງ 14.000 ຕາແມັດ, ສິນຄ້າວາງສະແດງກວ່າ 1 ໝື່ນລາຍການ.
ງານຄັ້ງນີ້ເປັນເຈົ້າການຈັດໂດຍພະແນກການຄ້າແຂວງກວາງຕຸ້ງ ສປ ຈີນ, ມີສະມາຄົມສົ່ງເສີມການຄ້ານະຄອນຊູ່ໂຈ່ວເປັນຜູ້ຊ່ວຍຈັດງານ. ໃນໄລຍະຈັດງານ, ຝ່າຍຈັດງານຍັງຈະຈັດກອງປະຊຸມເວທີປຶກສາຫາລືການລົງທຶນສາກົນ ແລະການຮ່ວມມືດ້ານຄວາມສາມາດການຜະລິດຈີນ-ອີຣານ, ງານໂຄສະນາຜະລິດຕະພັນຍີ່ຫໍ້ຈີນ ແລະກິດຈະກຳອື່ນໆອີກ.