ລັດຖະບານຊີຣີກ່າວປະນາມການໂຈມຕີທາງອາກາດຂອງກຸ່ມພັນທະມິດສາກົນເປັນເຫດໃຫ້ປະຊາຊົນເສຍຊີວິດ

ກະຊວງການຕ່າງປະເທດຊີຣີອອກຖະແຫຼງການໃນວັນທີ 14 ທັນວານີ້ວ່າ, ກຸ່ມພັນທະມິດສາກົນທີ່ນຳໂດຍອາເມລິກາໄດ້ກໍ່ການໂຈມຕີທາງອາກາດຕໍ່ເຂດຊຸມຊົນຢູ່ເມືອງແຫ່ງໜຶ່ງທາງພາກຕາເວັນອອກແຂວງເຕໂຈປະເທດຕົນໃນວັນທີ 13 ທັນວາ, ສົ່ງຜົນເຮັດໃຫ້ປະຊາຊົນ 23 ຄົນທີ່ມີທັງແມ່ຍິງແລະເດັກນ້ອຍເສຍຊີວິດ, ການໂຈມຕີຍັງໄດ້ທຳລາຍພື້ນຖານໂຄງລ່າງແລະເຮັດໃຫ້ຊັບສິນຂອງປະຊາຊົນໄດ້ຮັບຄວາມເສຍຫາຍ.

ເດືອນກັນຍາປີ 2014, ອາເມລິກາແລະຫຼາຍປະເທດໄດ້ຕັ້ງເປັນກຸ່ມພັນທະມິດສາກົນເພື່ອໂຈມຕີທາງອາກາດຕໍ່ເປົ້າໝາຍຂອງກຸ່ມ IS ເຊິ່ງເປັນກຸ່ມຫົວຮຸນແຮງຢູ່ດິນແດນຊີຣີແລະອີຣັກ. ລັດຖະບານຊີຣີເຫັນວ່າການໂຈມຕີດັ່ງກ່າວບໍ່ໄດ້ຮັບການມອບສິດຈາກສະພາຄວາມໝັ້ນຄົງອົງການສະຫະປະຊາຊາດ, ແລະກ່າວປະນາມການໂຈມຕີທາງອາກາດທີ່ເປັນເຫດໃຫ້ປະຊາຊົນຊີຣີເສຍຊີວິດແລະບາດເຈັບຢ່າງຫຼວງຫຼາຍ.