ວັນທີ 14 ທັນວານີ້ ຢູ່ຫໍສະພາປະຊາຊົນ, ທ່ານ ສີຈິ້ນຜິງ ປະທານປະເທດຈີນ ໄດ້ພົບປະເຈລະຈາກັບທ່ານ ມຸນເຈອິນ ປະທານາທິບໍດີ ສ.ເກົາຫຼີທີ່ມາຢ້ຽມຢາມຈີນທາງລັດຖະກິດ.
ໂອກາດດັ່ງກ່າວ, ປະມຸກລັດສອງປະເທດໄດ້ແລກປ່ຽນຄວາມເຫັນກ່ຽວກັບສາຍພົວພັນສອງຝ່າຍ ແລະກ່າວວ່າ, ຈະເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ມິດຕະພາບ ແລະ ການຮ່ວມມືລະຫວ່າງສອງປະເທດ, ເຮັດໃຫ້ການໄປມາຫາສູ່ກັນລະຫວ່າງທຸກຊັ້ນໃກ້ຊິດກວ່າເກົ່າ, ລົງເລິກການຮ່ວມມືໃນຂົງເຂດທີ່ແທດເໝາະກັບຕົວຈິງ ທັງບັນລຸການພັດທະນາພ້ອມກັນ. ສອງຝ່າຍຈະເພີ່ມທະວີການສ້າງ "ໜຶ່ງແລວທາງໜຶ່ງເສັ້ນທາງ", ຊຸກຍູ້ "ໜຶ່ງແລວທາງໜຶ່ງເສັ້ນທາງ" ເຊື່ອມຕໍ່ກັບຍຸດທະສາດພັດທະນາຂອງສ.ເກົາຫຼີ ເພື່ອຊ່ວຍການພັດທະນາສາຍພົວພັນຈີນ-ສ.ເກົາຫຼີໃຫ້ຢ່າງຍາວນານແລະປອດໃສ.
ນອກນັ້ນ, ປະມຸກລັດທັງສອງ ຍັງໄດ້ແລກປ່ຽນຄວາມຄິດກ່ຽວກັບສະຖານະການແຫຼມເກົາຫຼີ ໂດຍກ່າວວ່າຈະຍຶດໝັ້ນເປົ້າໝາຍປອດນິວເຄລຍຂອງແຫຼມເກົາຫຼີ, ສຸມໃສ່ແກ້ໄຂບັນຫານິວເຄລຍແຫຼມເກົາຫຼີດ້ວຍສັນຕິວິທີ, ຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນຕົນ.
ທ່ານ ສີຈິ້ນຜິງ ໄດ້ກ່າວຢ້ຳເຖິງຫຼັກໝັ້ນຂອງຈີນໃນບັນຫາລະບົບຕ້ານຂີປະນາວຸດ "ທັດ" ແລະຫວັງໃຫ້ ສ.ເກົາຫຼີຈົ່ງແກ້ໄຂບັນຫາດັ່ງກ່າວຢ່າງເໝາະສົມຕໍ່ໄປ.
ຫຼັງການພົບປະ, ປະມຸກລັດສອງປະເທດໄດ້ຮ່ວມກັນເປັນພິຍານໃຫ້ແກ່ການລົງນາມໃນເອກະສານຮ່ວມມືສອງຝ່າຍໃນຂົງເຂດຕ່າງໆ ເຊັ່ນ: ເສດຖະກິດການຄ້າ, ອຸດສາຫະກຳນິເວດສີຂຽວ, ສິ່ງແວດລ້ອມ, ສາທາລະນະສຸກ, ກະສິກຳ, ພະລັງງານ, ງານໂອລິມປິກລະດູໜາວ ແລະ ອື່ນໆ.
 |
