ວັນທີ 16 ທັນວານີ້ ກອງທະຫານອີຮັກເລີ່ມເຄື່ອນໄຫວຢູ່ເຂດຊົນນະບົດທາງພາກກາງອີຮັກ ເພື່ອກວາດລ້າງອິດທິກຳລັງຂອງກຸ່ມ IS ທີ່ເປັນອົງການຫົວຮຸນແຮງທີ່ລີ້ຊອນຢູ່ພົ້ນ.
ວັນທີ 16 ທັນວານີ້ ກອງບັນຊາການຮ່ວມທາງການທະຫານອີຮັກຖະແຫຼງວ່າ, ມື້ດຽວກັນ ກອງທະຫານລັດຖະບານເລີ່ມກວາດລ້າງເຂດຕໍ່ແດນລະຫວ່າງແຂວງຊາລາຮູຕິນແລະແຂວງຕີຢາລາ,ໄດ້ທຳລາຍບ່ອນລີ້ຊອນບ່ອນໜຶ່ງຂອງພວກປະກອບອາວຸດກຸ່ມ IS.
ຖະແຫຼງການລະບຸວ່າ, ການເຄື່ອນໄຫວເທື່ອນີ້ໄດ້ຮັບການຊ່ວຍເຫຼືອຈາກກອງທະຫານລາດນິກາຍຊາອິດ. ຕໍ່ໄປ ກອງທະຫານລັດຖະບານຈະສຶບຕໍ່ເຄື່ອນໄຫວຢູ່ເຂດດັ່ງກ່າວ, ຈົນຮອດເວລາທີ່ກວາດລ້າງພວກປະກອບອາວຸດທີ່ລີ້ຢູ່ແຫ່ງນັ້ນຢ່າງເຖິງຖອງ.
ໃນຫຼາຍເດືອນຜ່ານມາ,ກອງທະຫານລັດຖະບານອີຮັກໄດ້ຍຶດເອົາປ້ອມປະຈຳຂອງກຸ່ມ IS ຢູ່ແຂວງຊາລາຮູຕິນແລະແຂວງຕີຢາລານັ້ນຄືນ, ແລະມີພວກປະກອບອາວຸດຈຳນວນໜຶ່ງໄດ້ໂຕນໜີໄປເຂດໄມປິຈາ. ວັນທີ 9 ທັນວານີ້ ທ່ານໄຮເຕິ ອາ ອາບາຕີ ນາຍົກລັດຖະມົນຕີອີຮັກປະກາດວ່າ, ກອງທະຫານລັດຖະບານໄດ້ຍຶດເອົາດິນແດນທີ່ຖືກກຸ່ມ IS ຍຶດຄອງນັ້ນຄືນໝົດ, ອີຮັກໄດ້ຮັບໄຊຊະນະຄັ້ງປະຫວັດສາດໃນການໂຈມຕີກຸ່ມ IS. ແຕ່ວ່າ ປັດຈຸບັນຍັງມີພວກຫົວຮຸນແຮງຈຳນວນໜຶ່ງລີ້ຊອນຢູ່ເຂດຮົກເຮື້ອແລະເຂດພູດອຍຂອງອີຮັກ ເພື່ອຊອກຫາໂອກາດໂຈມຕີຄືນ.