ສະຫະພັນທ່ອງທ່ຽວໂລກ ຫຼື WTA ແລະອຳນາດການປົກຄອງແຂວງເຈີ້ຈ່ຽງ ສປ ຈີນ ໄດ້ຮ່ວມລົງນາມການຮ່ວມມືທາງຍຸດທະສາດ ຢູ່ນະຄອນຫຼວງປັກກິ່ງ ໃນວັນທີ 17 ທັນວານີ້ ໂດຍຕົກລົງຈະສ້າງຕັ້ງສຳນັກງານໃຫຍ່ສະຫະພັນທ່ອງທ່ຽວໂລກຢູ່ແຄມໜອງຊ່ຽວຊ່ານຊ່ຽງ ນະຄອນຫັງໂຈ່ວ ຢ່າງເປັນທາງການ.
ທ່ານຫຼີຈິ່ນຈາວ ຫົວໜ້າອົງການທ່ອງທ່ຽວແຫ່ງຊາດຈີນ ທັງເປັນປະທານຄະນະກຳມະການຈັດຕັ້ງສະຫະພັນທ່ອງທ່ຽວໂລກ ກ່າວວ່າ: ສະຫະພັນທ່ອງທ່ຽວໂລກ ໄດ້ສະແດງໃຫ້ເຫັນເຖິງຄວາມຕັດສິນໃຈຂອງຜູ້ປະກອບການທ່ອງທ່ຽວຂອງຈີນໃນການປະດິດສ້າງແລະການປະຕິຮູບ ທັງສະແດງໃຫ້ເຫັນເຖິງຄວາມປາຖະໜາອັນແຮງກ້າຂອງຜູ້ປະກອບການທ່ອງທ່ຽວທົ່ວໂລກໃນການຄົ້ນຄວ້າແລະຫາລືການຮ່ວມມື ເຊິ່ງມີຜົນດີຕໍ່ການຍົກສູງສິດປະກອບຄຳເຫັນ ແລະ ບົດບາດຂອງຈີນໃນວົງການທ່ອງທ່ຽວໂລກ.
ທ່ານຫຼີຈິ່ນຈາວ ກ່າວຕື່ມວ່າ: WTA ແມ່ນອົງການຈັດຕັ້ງທີ່ບໍ່ຂຶ້ນກັບລັດຖະບານທີ່ລິເລີ່ມ ສ້າງໂດຍຈີນ ແລະໄດ້ສ້າງຕັ້ງຂຶ້ນຢູ່ນະຄອນເສິງຕູ່ ແຂວງເສສວນໃນເດືອນກັນຍາປີນີ້ ໂດຍຖືເປັນເວທີການຮ່ວມມື ແລະ ປົກຄຸມຢ່າງກວ້າງຂວາງ ໂດຍສະເພາະຜ່ານຈາກການເພີ່ມທະວີການຮ່ວມມືລະຫວ່າງສະມາຄົມທ່ອງທ່ຽວບັນດາປະເທດທີ່ຜ່ານ WTA, ຈະສາມາດລວມຊັບພະຍາກອນທ່ອງທ່ຽວປະເພດຕ່າງໆໃນໂລກ ແລະ ຮ່ວມກັນຊຸກຍູ້ຂະແໜງການທ່ອງທ່ຽວໂລກໃຫ້ພັດທະນາຢ່າງປອດໃສ ແລະຕໍ່ເນື່ອງ.