ທ່ານອາຣິຟ ຢາຮ໌ຢາ ລັດຖະມົນຕີກະຊວງທ່ອງທ່ຽວອິນໂດເນເຊຍ ໄດ້ໃຫ້ສຳພາດຕໍ່ນັກຂ່າວ ຢູ່ນະຄອນຫຼວງຈາກາຕາໃນວັນທີ 15 ທັນວານີ້ວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ ແລະ ແຜນການສ້າງ "ທາງດ່ວນທາງທະເລ" ຂອງອິນໂດເນເຊຍ ຕ່າງສະໜັບສະໜູນ ແລະ ເຊື່ອມຈອດກັນ ເຊິ່ງຈະເປັນໂອກາດສະໜອງທຶນໃຫ້ແກ່ການພັດທະນາພື້ນຖານໂຄງລ່າງ ກໍຄືການທ່ອງທ່ຽວຂອງອິນໂດເນເຊຍ ຈຶ່ງເຫັນໄດ້ວ່າ ການຮ່ວມມືດ້ານການທ່ອງທ່ຽວລະຫວ່າງສອງປະເທດຈະມີອະນາຄົດອັນກວ້າງຂວາງແລະສົດໃສກວ່າເກົ່າ.
ທ່ານຢາຮ໌ຢາ ກ່າວຕື່ມວ່າ: ອິນໂດເນເຊຍພວມສຸມໃສ່ສ້າງແຫຼ່ງທ່ອງທ່ຽວ "ບາຫຼີໃໝ່" 10 ແຫ່ງ, ຫວັງວ່າວິສາຫະກິດຈີນທີ່ເຂົ້າຮ່ວມການສ້າງ "ໜຶ່ງແລວທາງໜຶ່ງເສັ້ນທາງ" ຈະສະໜັບສະໜູນແຜນການດັ່ງກ່າວຂອງລັດຖະບານອິນໂດເນເຊຍ ແລະມາລົງທຶນ. ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແມ່ນໂອກາດສຳຄັນສຳລັບອິນໂດເນເຊຍທີ່ສາມາດດຶງດູດນັກທ່ອງທ່ຽວຈີນໃຫ້ໄດ້ຫຼາຍກວ່າເກົ່າ. ສະນັ້ນ, ອິນໂດເນເຊຍ ຈຶ່ງໄດ້ສ້າງໂຄງການທ່ອງທ່ຽວ "ເດີນຕາມເສັ້ນທາງເຈິ້ງເຫີ" ເຊິ່ງເປັນລາຍການທ່ອງທ່ຽວສຳລັບນັກທ່ອງທ່ຽວຈີນ.