ທ່ານລູ້ຄ່າງ ໂຄສົກກະຊວງການຕ່າງປະເທດຈີນກ່າວໃນພິທີຖະແຫຼງຂ່າວທີ່ຈັດຂຶ້ນໃນວັນທີ 15 ທັນວານີ້ວ່າ, ພາຍໃຕ້ຄວາມພະຍາຍາມຮ່ວມຂອງຈີນ ແລະ ບັນດາປະເທດໃນອາຊຽນ, ປັດຈຸບັນນີ້, ສະຖານະການຢູ່ທະເລຈີນໃຕ້ໄດ້ຂະຫຍາຍໄປສູ່ທິດທາງທີ່ດີເລື້ອຍໆ, ຈີນຫວັງໃຫ້ປະເທດນອກພາກພື້ນ ແລະ ຝ່າຍທີ່ກ່ຽວຂ້ອງເຄົາລົບຄວາມພະຍາຍາມຂອງບັນດາປະເທດໃນພາກພື້ນນີ້, ຢ່າປັ້ນແຕ່ງເລື່ອງ ແລະ ສ້າງຄວາມຂັດແຍ້ງຂຶ້ນ.
ມີນັກຂ່າວຖາມໃນພິທີຖະແຫຼງຂ່າວວ່າ, ຕາມຂ່າວແຈ້ງວ່າ, ມີຄັງປັນຍາແຫ່ງໜຶ່ງຂອງອາເມລິກາໄດ້ເປີດເຜີຍຮູບຖ່າຍດາວທຽມໃນວັນທີ 14 ທັນວານີ້ ແລະ ຊີ້ອອກວ່າ, ຈີນໄດ້ຕິດຕັ້ງອຸປະກອນລາດາ ແລະ ອຸປະກອນອື່ນໆທີ່ສາມາດໃຊ້ທາງການທະຫານ ຢູ່ເກາະແລະຫີນໂສໂຄກທະເລຈີນໃຕ້. ກ່ອນໜ້ານີ້, ທ່ານ ເຣດ ຕີເລີຊັນ ລັດຖະມົນຕີການຕ່າງປະເທດອາເມລິກາໄດ້ຮຽກຮ້ອງໃຫ້ຈີນເຊົາການສ້າງສາເກາະຫີນໂສໂຄກຢູ່ທະເລຈີນໃຕ້. ຈີນມີຄຳຕອບແນວໃດຕໍ່ສອງເລື່ອງດັ່ງກ່າວ.
ທ່ານລູ້ຄ່າງກ່າວວ່າ, ຈີນໄດ້ດຳເນີນການສ້າງສາສັນຕິພາບຢູ່ເທິງດິນແດນຂອງຕົນ ແລະ ຕິດຕັ້ງສິ່ງກໍ່ສ້າງປ້ອງກັນຕົວທີ່ຈຳເປັນ ແມ່ນເລື່ອງທີ່ປົກກະຕິທີ່ສຸດ ເຊິ່ງເປັນອະທິປະໄຕຂອງຈີນ. ການປັ້ນແຕ່ງເລື່ອງລາວ ແລະ ສ້າງຄວາມສັບສົນໃນບັນຫານີ້, ພວກເຮົາເຫັນວ່າ ເປັນການກະທຳທີ່ມີເຈດຈຳນົງອື່ນ.
 |
