ທ່ານຈ່າງເຕີຈ່ຽງ ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ພົບປະທ່ານໂດບາຕີ ຮອງປະທານສະພາແຫ່ງຊາດຫວຽດນາມ ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງໃນວັນທີ 19 ທັນວານີ້.
ທ່ານຈ່າງເຕີຈ່ຽງກ່າວວ່າ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນໄດ້ເລືອກເອົາຫວຽດນາມເປັນປະເທດທຳອິດໃນການຢ້ຽມຢາມ ພາຍຫຼັງກອງປະຊຸມໃຫຍ່ຄັ້ງທີ 19 ຂອງພັກ ແລະ ໄດ້ຮ່ວມກັບຜູ້ນຳຫວຽດນາມອອກແບບ ແລະ ຈັດວາງຍຸດທະສາດຕໍ່ການຂະຫຍາຍການພົວພັນຈີນ-ຫວຽດນາມພາຍໃຕ້ສະຖານະການໃໝ່. ສະພາປະຊາຊົນແຫ່ງຊາດຈີນ ແລະ ສະພາແຫ່ງຊາດຫວຽດນາມຄວນຖືເອົາການຜັນຂະຫຍາຍຄວາມເປັນເອກະພາບລະຫວ່າງຜູ້ນຳສອງປະເທດເປັນໜ້າທີ່ອັນດັບໜຶ່ງ, ເພີ່ມທະວີການແລກປ່ຽນຮ່ວມມືໃນຂັ້ນຕ່າງໆ, ເພີ່ມຄວາມເຂົ້າໃຈກັນ ແລະ ຄວາມໄວ້ເນື້ອເຊື່ອໃຈກັນທາງການເມືອງ, ຖອດຖອນບົດຮຽນໃນດ້ານການປົກຄອງປະເທດ ແລະ ນິຕິບັນຍັດ, ປັບປຸງນະໂຍບາຍ ແລະ ສະພາບແວດລ້ອມດ້ານກົດໝາຍໃຫ້ແກ່ການຮ່ວມມືທາງເສດຖະກິດການຄ້າ ແລະ ການໄປມາຫາສູ່ກັນດ້ານບຸກຄະລາກອນ, ປັບປຸງພື້ນຖານປະຊາມະຕິຂອງການພົວພັນລະຫວ່າງສອງປະເທດ ແລະ ຮ່ວມກັນສ້າງຄູ່ຮ່ວມຊາຕາກຳຂອງສອງພັກ ແລະ ສອງລັດ ຈີນ-ຫວຽດນາມ.
ທ່ານໂດບາຕີກ່າວວ່າ, ສະພາແຫ່ງຊາດຫວຽດນາມຍິນດີເພີ່ມທະວີການພົວພັນໄມຕີຈິດມິດຕະພາບກັບສະພາປະຊາຊົນແຫ່ງຊາດຈີນ, ຊຸກຍູ້ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ແລະ ຊຸກຍູ້ການໄປມາຫາສູ່ກັນລະຫວ່າງທ້ອງຖິ່ນ ເພື່ອຊ່ວຍຊຸກຍູ້ໃຫ້ການພົວພັນຈີນ-ຫວຽດນາມຂະຫຍາຍຕົວຢ່າງບໍ່ຢຸດຢັ້ງ.
 |
