ກອງປະຊຸມວຽກງານເສດຖະກິດສູນກາງຈີນໄດ້ຈັດຂຶ້ນຢູ່ນະຄອນຫຼວງປັກກິ່ງແຕ່ວັນທີ 18 ຫາວັນທີ 20 ທັນວານີ້. ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ກ່າວປາໄສສຳຄັນໃນກອງປະຊຸມ, ເພື່ອຖອດຖອນບົດຮຽນຂະບວນການພັດທະນາເສດຖະກິດຂອງຈີນເມື່ອກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 18 ມານີ້, ວິເຄາະສະພາບເສດຖະກິດໃນປັດຈຸບັນແລະຈັດວາງວຽກງານເສດຖະກິດໃນປີ 2018. ກອງປະຊຸມເຫັນວ່າ, ແນວຄິດເສດຖະກິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ທີ່ສະເໜີໂດຍທ່ານສີຈິ້ນຜິງແມ່ນຜົນງານທິດສະດີທີ່ໄດ້ປະຕິບັດເພື່ອຊຸກຍູ້ການພັດທະນາເສດຖະກິດຂອງຈີນໃນ 5 ປີຜ່ານມາ, ແມ່ນໝາກຜົນຫຼ້າສຸດຂອງວິຊາເສດຖະສາດການເມືອງສັງຄົມນິຍົມທີ່ມີສີສັນພິເສດຂອງຈີນ, ຕ້ອງຍຶດໝັ້ນເປັນໄລຍະຍາວແລະພັດທະນາໃຫ້ສົມບູນຂຶ້ນຢ່າງບໍ່ຢຸດຢັ້ງ.
ສຳລັບວຽກງານເສດຖະກິດໃນປີ 2018, ກອງປະຊຸມຊີ້ໃຫ້ເຫັນວ່າ, ຄວນລົງເລິກການປະຕິຮູບໂຄງປະກອບດ້ານການສະໜອງ, ເລັ່ງການປະຕິຮູບຫຼາຍດ້ານເຊັ່ນຄວາມສີວິໄລດ້ານນິເວດແລະອື່ນໆ, ຕໍ່ຕ້ານການເຄື່ອນໄຫວການເງິນທີ່ລະເມີດກົດໝາຍແລະກົດລະບຽບຢ່າງເດັດດ່ຽວ, ເພີ່ມທະວີການກໍ່ສ້າງລະບົບຕິດຕາມຄວບຄຸມທີ່ອ່ອນແອ.
ກອງປະຊຸມຮຽກຮ້ອງໃຫ້ທົ່ວພັກແລະທົ່ວປວງຊົນມີຄວາມສາມັກຄີກັນຢ່າງແໜ້ນແຟ້ນຢູ່ອ້ອມຂ້າງສູນກາງພັກທີ່ມີທ່ານສີຈິ້ນຜິງເປັນແກນກາງຢ່າງໃກ້ຊິດ, ມີຈິດໃຈຫ້າວຫັນບຸກໜ້າປຶນຕົວ, ເພື່ອປະຕິບັດວຽກງານຕ່າງໆໃຫ້ໄດ້ຮັບຜົນດີ, ທັງຮັບປະກັນວຽກງານເສດຖະກິດໃນປີໜ້າມີການເລີ່ມຕົ້ນທີ່ດີ.