ທ່ານນາງຮວ້າຊຸນຢິງ ໂຄສົກກະຊວງການຕ່າງປະເທດຈີນໄດ້ຖະແຫຼງໃນວັນທີ 21 ທັນວານີ້ວ່າ: ກອງປະຊຸມລັດຖະມົນຕີການຕ່າງປະເທດຈີນ-ອັຟການິສະຖານ-ປາກີສະຖານຄັ້ງປະຖົມມະເລີກຈະຈັດຂຶ້ນໃນວັນທີ 26 ທັນວານີ້ຢູ່ນະຄອນຫຼວງປັກກິ່ງແຫ່ງ ສປ ຈີນ ແລະໂດຍຕອບສະໜອງຕາມຄຳເຊີນຂອງທ່ານວາງຢີ້ ລັດຖະມົນຕີກະຊວງການຕ່າງປະເທດຈີນ, ທ່ານຊາລາຮຸດດິນ ຣາບານີລັດຖະມົນຕີກະຊວງການຕ່າງປະເທດອັຟການິສະຖານແລະທ່ານຄາວາຈາ ອາຊິຟລັດຖະມົນຕີກະຊວງການຕ່າງປະເທດປາກີສະຖານພ້ອມຄະນະໄດ້ສຕອບຮັບຄຳເຊີນແລະຈະເຂົ້າຮ່ວມກອງປະຊຸມຄັ້ງນີ້.
ທ່ານນາງຮວ້າຊຸນຢິງ ໃຫ້ຮູ້ວ່າ: ກອງປະຊຸມຄັ້ງນີ້ຈະເປັນກອງປະຊຸມເຈລະຈາຄັ້ງທຳອິດລະຫວ່າງລັດຖະມົນຕີການຕ່າງປະເທດຂອງຈີນ-ອັຟການິສະຖານ-ປາກີສະຖານ ເຊິ່ງສາມຝ່າຍຈະລົງເລິກແລກປ່ຽນຄວາມເຫັນກ່ຽວກັບ 3 ຫົວຂໍ້ໃຫຍ່ຄື ຄວາມໄວ້ເນື້ອເຊື່ອໃຈກັນທາງການເມືອງກັບຄວາມປອງດອງ, ການຮ່ວມມືເພື່ອການພັດທະນາແລະການເຊື່ອມຈອດກັນ, ການຮ່ວມມືເພື່ອຮັກສາຄວາມໝັ້ນຄົງກັບການຕ້ານການກໍ່ການຮ້າຍ. ຈີນຫວັງວ່າຜ່ານຈາກກອງປະຊຸມຄັ້ງນີ້,ສາມຝ່າຍຈະບັນລຸຄວາມເປັນເອກະພາບກັນ, ເພີ່ມຄວາມໄວ້ເນື້ອເຊື່ອໃຈກັນແລະສົ່ງເສີມການປັບປຸງສາຍພົວພັນອັຟການິສະຖານກັບປາກີສະຖານໃຫ້ດີຂຶ້ນ, ຊຸກຍູ້ການຮ່ວມມືລະຫວ່າງສອງຝ່າຍເພື່ອຮ່ວມກັນສຸມໃສ່ການຮັກສາສັນຕິພາບ,ສະຖຽນລະພາບແລະການພັດທະນາຂອງພາກພື້ນຕົນ.