ວັນທີ 21 ທັນວານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ສົ່ງສານຊົມເຊີຍການເລີ່ມກໍ່ສ້າງໂຄງການຮ່ວມມືທາງລົດໄຟຈີນ-ໄທໄລຍະທີ 1 ເຊິ່ງທ່ານປະຍຸດ ຈັນໂອຊາ ນາຍົກລັດຖະມົນຕີໄທເຂົ້າຮ່ວມພິທີເປີດການກໍ່ສ້າງ ທັງກ່າວປາໄສ.
ທ່ານຫຼີເຄີ້ສຽງ ກ່າວໃນສານຊົມເຊີຍວ່າ: ໂຄງການຮ່ວມມືທາງລົດໄຟຈີນ-ໄທ ແມ່ນໂຄງການສຳຄັນອັນດັບໜຶ່ງສຳລັບສອງຝ່າຍຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ແລະດຳເນີນການຮ່ວມມືດ້ານຄວາມສາມາດການຜະລິດ ເຊິ່ງໄດ້ສະແດງໃຫ້ເຫັນເຖິງຈິດໃຈແຫ່ງການປຶກສາຫາລືຮ່ວມກັນ, ກໍ່ສ້າງຮ່ວມກັນ ແລະ ຊົມໃຊ້ຮ່ວມກັນ, ເປັນໂຄງການທີ່ຕ່າງຝ່າຍຕ່າງມີຜົນປະໂຫຍດ ແລະຈະສາມາດຍົກລະດັບການກໍ່ສ້າງພື້ນຖານໂຄງລ່າງແລະການເຊື່ອມຈອດລະຫວ່າງໄທກັບພາກພື້ນຢ່າງມີປະສິດທິຜົນ, ຊຸກຍູ້ເສດຖະກິດໄທໃຫ້ພັດທະນາຢ່າງຕໍ່ເນື່ອງ ແລະຊຸກຍູ້ດຶງດູດການພັດທະນາ-ຄວາມຈະເລີນຮຸ່ງເຮືອງ ພ້ອມທັງປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ຫວັງວ່າສອງຝ່າຍຈະສືບຕໍ່ຮັກສາການຮ່ວມມືຢ່າງແໜ້ນແຟ້ນ, ດຳເນີນການກໍ່ສ້າງໂຄງການຮ່ວມມືທາງລົດໄຟຈີນ-ໄທໄລຍະທີ 1 ໃຫ້ສຳເລັດຢ່າງມີຄຸນນະພາບສູງ, ຊຸກຍູ້ວຽກງານຂອງໂຄງການໄລຍະທີ 2 ຢ່າງຈິງຈັງ, ພະຍາຍາມໃຫ້ບັນລຸການເຊື່ອມຈອດທາງລົດໄຟຈີນ-ໄທ ແລະ ທາງລົດໄຟຈີນ-ລາວໂດຍໄວ, ສົ່ງເສີມເສດຖະກິດການຄ້າ, ການໄປມາຫາສູ່ແລກປ່ຽນກັນລະຫວ່າງປະຊາຊົນບັນດາປະເທດຢູ່ລຽບຕາມທາງລົດໄຟດັ່ງກ່າວ ແລະບັນລຸຕ່າງຝ່າຍຕ່າງມີຜົນປະໂຫຍດ.