ແຫຼ່ງຂ່າວຈາກໜັງສືພິມ "ເສດຖະກິດລາຍວັນ" ຂອງຈີນໃຫ້ຮູ້ວ່າ: ພະແນກຕິດຕາມຂະແໜງການທະນາຄານເຂດອ່າເຄີ້ຊູ່ ເຂດຊິ່ນຈ່ຽງ ໄດ້ຕັ້ງໜ້າຊີ້ນຳຂະແໜງການທະນາຄານທີ່ຢູ່ໃຕ້ການຄຸ້ມຄອງຂອງຕົນປະກອບສ່ວນໃນການຫຼຸດຜ່ອນຄວາມທຸກຍາກ ໂດຍຊີ້ນຳຄອບຄົວທຸກຍາກເສີມຂະຫຍາຍບົດບາດຂອງຕົນ ເພື່ອຂະຫຍາຍຊ່ອງທາງສ້າງລາຍຮັບ ແລະນັບແຕ່ຕົ້ນປີນີ້ເປັນຕົ້ນມາ ກໍໄດ້ປ່ອຍເງິນກູ້ໃຫ້ຊາວລ້ຽງສັດ ຈຶ່ງເຮັດໃຫ້ເຂົາເຈົ້າສາມາດຫຼຸດພົ້ນຈາກຄວາມທຸກຍາກໄດ້ 50.000 ກວ່າຄົນ.
ແຕ່ປີນີ້ເປັນຕົ້ນມາ, ເຂດອ່າເຄີ້ຊູ່ ໄດ້ຕອບສະໜອງຕາມຄວາມຕ້ອງການຂອງປະຊາກອນຜູ້ທຸກຍາກເປັນບຸລິມະສິດ ແລະຮັບປະກັນປ່ອຍເງິນກູ້ໃຫ້ຄອບຄົວທຸກຍາກທີ່ໄດ້ຈົດທະບຽນ. ມາຮອດທ້າຍເດືອນພະຈິກຜ່ານມາ, ໂດຍລວມແລ້ວ ໄດ້ປ່ອຍເງິນກູ້ສິນເຊື່ອລາຍຍ່ອຍ 817 ລ້ານຢວນ ໂດຍບໍ່ຕ້ອງຊວດຈຳ ແລະ ຜູ້ຮັບປະກັນ, ທັງໃຫ້ຂະແໜງການເງິນຖົມຂຸມດອກເບ້ຍກວ່າ 14.160.000 ຢວນ. ຈາກການປ່ອຍເງິນດັ່ງກ່າວ ແລະ ດ້ວຍການຊີ້ນຳຈາກອົງການລັດຖະບານ, ຊາວລ້ຽງສັດຜູ້ທຸກຍາກທີ່ໄດ້ຈົດທະບຽນ 52.300 ກວ່າຄົນ ສາມາດຫຼຸດພົ້ນຈາກຄວາມທຸກຍາກໃນປີນີ້ ໂດຍຜ່ານຊ່ອງທາງຕ່າງໆ ເຊັ່ນ ປູກພືດ, ລ້ຽງສັດ.
ນອກນີ້, ພະແນກຕິດຕາມຂະແໜງການທະນາຄານເຂດອ່າເຄີ້ຊູ່ ຍັງຊີ້ນຳອົງການທະນາຄານເລັ່ງລັດສ້າງສະພາບແວດລ້ອມການບໍລິການຊຳລະເງິນໃນຊົນນະບົດອີກດ້ວຍ.
