ຂ່າວສານຊິນຮວາລາຍງານວ່າ: ຮ່າງກົດໝາຍວ່າດ້ວຍສາທາລະນະສຸກຂັ້ນພື້ນຖານແລະສົ່ງເສີມສຸຂະພາບທີ່ໄດ້ສະເໜີໃຫ້ກອງປະຊຸມຄະນະກຳມະການປະຈຳສະພາປະຊາຊົນແຫ່ງຊາດຈີນພິຈາລະນາເປັນຄັ້ງທຳອິດໃນເມື່ອມໍ່ໆນີ້ໄດ້ລະບຸຢ່າງຈະແຈ້ງວ່າ: ຕ້ອງຮັບປະກັນຄວາມຕ້ອງການຂອງພົນລະເມືອງໃນດ້ານການປິ່ນປົວແລະຮັກສາສຸຂະພາບດ້ວຍການກະກຽມງົບປະມານຈາກຫຼາຍຊ່ອງທາງຄືລັດ,ສັງຄົມແລະສ່ວນບຸກຄົນ, ລັດຈະສະໜອງການບໍລິການສາທາລະນະສຸກຂັ້ນພື້ນຖານໃຫ້ແກ່ພົນລະເມືອງທຸກຖ້ວນໜ້າໂດຍບໍ່ເກັບຄ່າ.
ຮ່າງກົດໝາຍສະເໜີວ່າ: ລັດຈະສ້າງຕັ້ງລະບົບປະກັນໄພການປິ່ນປົວຂັ້ນພື້ນຖານທີ່ມີຫຼາຍລະດັບໂດຍກຳນົດເອົາການປະກັນໄພການປິ່ນປົວພື້ນຖານເປັນຫຼັກ, ການປະກັນສຸຂະພາບແບບທຸລະກິດ, ການຊ່ວຍເຫຼືອການປິ່ນປົວ, ການຊ່ວຍເຫຼືອປິ່ນປົວສຸກເສີນ,ການກຸສົນດ້ານການປິ່ນປົວແລະອື່ນໆເປັນສຳຮອງ.
ຮ່າງກົດໝາຍດັ່ງກ່າວເປັນຂອດສຳຄັນໃນການປະຕິຮູບລະບົບການປິ່ນປົວແບບຫຼາຍພາກສ່ວນຮ່ວມປະສານງານ ເຊິ່ງໄດ້ສະເໜີໃຫ້ເສີມຂະຫຍາຍບົດບາດການຍ້ອງຍໍແລະການຜູກມັດຂອງມາດຕະຖານແລະວິທີຊຳລະສະສາງການປະກັນໄພການປິ່ນປົວຂັ້ນພື້ນຖານ, ນຳພາໂຮງໝໍປະຕິບັດການປິ່ນປົວຄົນເຈັບຢ່າງສົມເຫດສົມຜົນ, ສົ່ງເສີມໃຫ້ຄົນເຈັບໄປປິ່ນປົວພະຍາດຢູ່ໂຮງໝໍທີ່ເໝາະສົມແລະຍົກປະສິດທິພາບການນຳໃຊ້ກອງທຶນປະກັນໄພການປິ່ນປົວຂັ້ນພື້ນຖານ.