ລັດຖະບານໄທອອກແຈ້ງການໃນຕອນຄ່ຳວັນທີ 22 ທັນວານີ້ ໂດຍປະກາດຄຳສັ່ງຂອງຄະນະຮັກສາຄວາມສະຫງົບແຫ່ງຊາດ ກ່ຽວກັບການດັດແກ້ບາງມາດຕາຂອງກົດໝາຍວ່າດ້ວຍພັກການເມືອງ ເພື່ອຍົກເລີກຄຳສັ່ງຫ້າມການເຄື່ອນໄຫວຂອງພັກການເມືອງຕ່າງໆ.
ທ່ານວິສະນຸ ເຄືອງາມ ຮອງນາຍົກລັດຖະມົນຕີໄທ ກ່າວວ່າ: ລັດຖະບານປະກາດດັດແກ້ກົດໝາຍວ່າດ້ວຍພັກການເມືອງ ເພື່ອແກ່ຍາວເວລາກະກຽມໃຫ້ແກ່ພັກການເມືອງຕ່າງໆກ່ອນຈະເຂົ້າຮ່ວມການແຂ່ງຂັນເລືອກຕັ້ງທົ່ວໄປ ເຊິ່ງໄດ້ແບ່ງອອກເປັນ 4 ໄລຍະ: ໄລຍະທີ 1 ຄືນັບແຕ່ວັນອອກແຈ້ງການຫາວັນທີ 1 ມີນາປີ 2018; ໄລຍະທີ 2 ນັບແຕ່ວັນທີ 1 ມີນາປີ 2018 ຫາວັນທີ 1 ເມສາປີດຽວກັນ, ໄລຍະທີ 3 ນັບແຕ່ວັນທີ 1 ເມສາປີ 2018 ເປັນຕົ້ນໄປ ແລະໄລຍະທີ 4 ຍົກເລີກຄຳສັ່ງຫ້າມການເຄື່ອນໄຫວຂອງພັກການເມືອງຕ່າງໆຢ່າງເປັນທາງການ. ກ່ອນຈະຍົກເລີກຄຳສັ່ງຫ້າມດັ່ງກ່າວຢ່າງເຖິງຖອງນັ້ນ, ຈະຢ່ອນຍານບາງມາດຕະການກ່ອນ ເພື່ອໃຫ້ພັກການເມືອງຕ່າງໆກະກຽມວຽກງານຂອງຕົນກ່ອນຈະດຳເນີນການເລືອກຕັ້ງທົ່ວໄປ, ແຕ່ກອງປະຊຸມໃຫຍ່ຂອງພັກການເມືອງຈະຕ້ອງລໍຖ້າຈົນຮອດການຍົກເລີກຄຳສັ່ງຫ້າມພັກການເມືອງແລ້ວຈຶ່ງຈະຈັດຂຶ້ນໄດ້.
ກ່ອນໜ້ານີ້, ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທ ເຄີຍກ່າວວ່າ: ຕົນຈະປະກາດວັນເວລາຈັດການເລືອກຕັ້ງທົ່ວໄປໃນເດືອນມິຖຸນາປີໜ້າ ແລະຄາດວ່າຈະຈັດການເລືອກຕັ້ງທົ່ວໄປໃນເດືອນພະຈິກປີ 2018.
