ກອງປະຊຸມປະທານລັດຖະສະພາ 6 ປະເທດຈັດຂຶ້ນຢູ່ປາກີສະຖານ
2017-12-26 15:37:57 cri
ຕາມຂ່າວ CRI: ກອງປະຊຸມປະທານລັດຖະສະພາ 6 ປະເທດຄື: ຈີນ ປາກີສະຖານ, ອັບການີສະຖານ, ອີຣານ, ຣັດເຊຍແລະຕວກກີໄດ້ຈັດຂຶ້ນຢູ່ນະຄອນຫຼວງ ອິສລາມາບັດປະເທດປາກີສະຖານແຕ່ວັນທີ 24 ຫາວັນທີ 25 ທັນວານີ້, ໂດຍໄດ້ປຶກສາຫາລືຫົວຂໍ້ຕໍ່ຕ້ານລັດທິກໍ່ການຮ້າຍແລະການເຊື່ອມຈອດກັນ, ແລະໄດ້ຜ່ານ "ຖະແຫຼງການອິສລາມາບັດ". ທ່ານຈ່າງຜິງ ຮອງປະທານຄະນະປະຈຳສະພາປະຊາຊົນແຫ່ງຊາດຈີນໄດ້ກ່າວໃນກອງປະຊຸມຄັ້ງນີ້ວ່າ, ລັດທິກໍ່ການຮ້າຍແມ່ນການຂົ່ມຂູ່ດ້ານຄວາມປອດໄພທີ່ປະເທດຢູ່ພາກພື້ນແລະປະຊາຄົມໂລກຜະເຊີນຮ່ວມກັນ, ການເຊື່ອມຈອດກັນແມ່ນປັດໄຈສຳຄັນຕໍ່ການພັດທະນາຂອງປະເທດຕ່າງໆ. ຈີນຍິນດີຮ່ວມກັບປະເທດຕ່າງໆ, ເພີ່ມທະວີການຮ່ວມມືດ້ານການຕໍ່ຕ້ານລັດທິກໍ່ການຮ້າຍ, ຮັກສາສັນຕິພາບແລະສະຖຽນລະພາບຂອງພາກພື້ນ, ເລັ່ງລັດຊຸກຍູ້ການກໍ່ສ້າງ "ໜຶ່ງແລວທາງໜຶ່ງເສັ້ນທາງ", ເພື່ອບັນລຸການເຊື່ອມຈອດກັນແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ພ້ອມກັນສ້າງປະຊາຄົມຮ່ວມຊາຕາກຳຂອງມວນມະນຸດ. ທ່ານຈ່າງຜິງກ່າວຕື່ມວ່າ, ກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ທີ່ສິ້ນສຸດລົງໃນຫວ່າງມໍ່ໆມານີ້ໄດ້ຕົກລົງແຜນງານອັນຍິງໃຫຍ່ແລະໂຄງການປະຕິບັດງານທີ່ຈີນຈະກ້າວໄປສູ່ "ຮ້ອຍປີສອງເທື່ອ" ໃນຍຸກໃໝ່, ຈີນຍິນດີແບ່ງປັນໂອກາດພັດທະນາກັບປະເທດຕ່າງໆ, ຮ່ວມກັນສ້າງວິໄສທັດອັນດີງາມ.