ພາຍໃຕ້ເບື້ອງຫຼັງທີ່ຈີນໄດ້ກາຍເປັນປະເທດການຄ້າໃຫຍ່, ກະຊວງການຄ້າຈີນໄດ້ສະເໜີສ້າງຕາຕະລາງເວລາທີ່ຈະສ້າງປະເທດຈີນໃຫ້ກາຍເປັນປະເທດການຄ້າທີ່ເຂັ້ມແຂງ.
ໃນກອງປະຊຸມວຽກງານການຄ້າທົ່ວປະເທດທີ່ຈັດຂຶ້ນໃນວັນທີ 25 ທັນວານີ້, ທ່ານຈົ່ງຊ່ານ ລັດຖະມົນຕີກະຊວງການຄ້າຈີນກ່າວວ່າ, ຈີນຈະປະຕິບັດຕາຕະລາງເວລາດັ່ງກ່າວໂດຍແບ່ງເປັນ 3 ໄລຍະ, ແລະສ້າງປະເທດຕົນເປັນປະເທດການຄ້າທີ່ເຂັ້ມແຂງກ່ອນປີ 2050. ບາດກ້າວທີໜຶ່ງ, ປັບປຸງຖານະການຄ້າໃຫຍ່ຂອງຈີນກ່ອນປີ 2020, ບາດກ້າວທີສອງ, ສ້າງປະເທດຈີນເປັນປະເທດການຄ້າເຂັ້ມແຂງໃນຂັ້ນພື້ນຖານກ່ອນປີ 2035, ແລະບາດກ້າວທີສາມ, ສ້າງປະເທດຈີນເປັນປະເທດການຄ້າທີ່ເຂັ້ມແຂງຢ່າງຮອບດ້ານກ່ອນປີ 2050.
ທ່ານຈົ່ງຊ່ານກ່າວວ່າ, ໃນ 5 ປີຕໍ່ໜ້າ, ການປະຕິຮູບແລະພັດທະນາວຽກງານການຄ້າຈີນຕົ້ນຕໍຈະຊຸກຍູ້ໜ້າທີ່ສຳຄັນໃນ 6 ດ້ານ, ແລະປະຕິບັດແຜນການເຄື່ອນໄຫວຫຼາຍຢ່າງ, ລວມທັງເພີ່ມທະວີບົດບາດພື້ນຖານຂອງການບໍລິໂພກຕໍ່ການພັດທະນາເສດຖະກິດ, ຍົກສູງທ່າແຮງໃໝ່ຂອງການຄ້າຕໍ່ຕ່າງປະເທດ, ຍົກສູງລະດັບການລົງທຶນສອງຝ່າຍ, ປັບປຸງສະພາບການເປີດປະຕູຂອງພາກພື້ນໃຫ້ດີຂຶ້ນ, ສ້າງສາຍພົວພັນການຄ້າສາກົນແບບໃໝ່, ແລະເພີ່ມຄວາມສາມາດຮັບໃຊ້ຊີວິດການເປັນຢູ່ທາງດ້ານປະຊາຊົນຂອງການຄ້າ.