ວັນທີ 23 ທັນວານີ້, ລັດຖະມົນຕີກະຊວງຍຸຕິທຳຟີລິບປີນໄດ້ລົງນາມຄຳສັ່ງຫ້າມບໍ່ໃຫ້ອອກປະເທດສະບັບໜຶ່ງໂດຍຊີ້ວ່າຍ້ອນວ່າໂຄງການສັກຢາວັກແຊງປ້ອງກັນໄຂ້ເລືອດອອກທີ່ເລີ່ມປະຕິບັດເມື່ອລັດຖະບານອາກີໂນນັ້ນພວມໄດ້ຮັບການກວດກາ, ສະນັ້ນທ່ານເບນິກໂນ ອາກີໂນ ອະດີດປະທານາທິບໍດີຟີລິບປີນ, ລັດຖະມົນຕີຫຼາຍທ່ານຂອງລັດຖະບານຊຸດຜ່ານມາ, ເຈົ້າໜ້າທີ່ລະດັບສູງຂອງບໍລິສັດຊະໂນຟີ ບັສເຕີເຊິ່ງເປັນບໍລິສັດຜະລິດວັກແຊງປ້ອງກັນໄຂ້ເລືອດອອກຂອງຝຣັ່ງຖືກສັ່ງຫ້າມບໍ່ໃຫ້ອອກຈາກຟີລິບປີນ, ນອກຈາກໄດ້ຮັບການອະນຸມັດຈາກລັດຖະມົນຕີກະຊວງຍຸຕິທຳກ່ອນ.
ບໍລິສັດຊະໂນຟີ ປັສເຕີ ເຊິ່ງເປັນບໍລິສັດຜະລິດຢາຝຣັ່ງໄດ້ສາລະພາບໃນເດືອນພະຈິກຜ່ານມານີ້ວ່າ, ວັກແຊງປ້ອງກັນໄຂ້ເລືອດອອກທີ່ບໍລິສັດຕົນຜະລິດນັ້ນອາດມີຄວາມສ່ຽງດ້ານຄວາມປອດໄພ. ຟີລິບປີນໄດ້ຈັດຊື້ວັກແຊງດັ່ງກ່າວຢ່າງຫຼວງຫຼາຍເລີ່ມແຕ່ປີ 2016 ມານີ້ໂຄງການສັກຢາວັກແຊງປ້ອງກັນໄຂ້ເລືອດອອກ, ແຜນການດັ່ງກ່າວໄດ້ໃຊ້ງົບປະມານ 3 ຕື້ 500 ລ້ານເປໂຊຫຼືປະມານ 70 ລ້ານໂດລາສະຫະລັດ. ມາຮອດປັດຈຸບັນມີເດັກນ້ອຍຫຼາຍກວ່າ 7 ແສນຄົນໄດ້ຮັບການສັກຢາວັກແຊງດັ່ງກ່າວ. ໃນຕົ້ນເດືອນທັນວານີ້, ກະຊວງຍຸຕິທຳ, ກະຊວງສາທາລະນະສຸກແລະສະພາສູງຟີລິບປີນໄດ້ດຳເນີນການກວດກາຕໍ່ໂຄງການສັກຢາວັກແຊງທີ່ລັດຖະບານອາກີໂນອະນຸມັດ.
 |
