ພິທີສຳເລັດການແຂ່ງຂັນລົດຣາລີສາກົນຈີນ-ອາຊຽນ 2017 ກໍຄື ການແຂ່ງຂັນລົດຣາລີສື່ມວນຊົນຈີນ-ອາຊຽນ ໄດ້ຈັດຂຶ້ນຢູ່ມະຫາວິທະຍາໄລອິນໂດເນເຊຍໃນວັນທີ 27 ທັນວານີ້ ໂດຍທ່ານຈຽງສິນ ອຸປະທູດຊົ່ວຄາວຂອງຈີນປະຈຳອາຊຽນ ແລະ ທ່ານອັກ ໂມຊະຕານ ຮອງເລຂາທິການໃຫຍ່ອາຊຽນເຂົ້າຮ່ວມ.
ທ່ານໂມຊະຕານ ກ່າວວ່າ: ຜູ້ຂັບລົດທີ່ເຂົ້າຮ່ວມການແຂ່ງຂັນ ໄດ້ເຫັນ ແລະສຳຜັດກັບມິດຕະພາບແລະການຮ່ວມມືລະຫວ່າງຈີນແລະອາຊຽນຕະຫຼອດທາງໃນການແຂ່ງຂັນ ເຊິ່ງບໍ່ພຽງແຕ່ເສີມຂະຫຍາຍໄມຕີຈິດມິດຕະພາບເທົ່ານັ້ນ, ແຕ່ຍັງໄດ້ເພີ່ມຄວາມເຂົ້າໃຈຕໍ່ວັດທະນະທຳແລະປະເພນີບັນດາປະເທດອີກດ້ວຍ. ຫວັງວ່າ ຜູ້ຂັບລົດທີ່ເຂົ້າຮ່ວມການແຂ່ງຂັນຈະສືບຕໍ່ພະຍາຍາມເພື່ອຊຸກຍູ້ໄມຕີຈິດມິດຕະພາບແລະການເຊື່ອມສຳພັນທາງຈິດໃຈຂອງປະຊາຊົນຈີນແລະອາຊຽນ.
ຂ່າວລາຍງານວ່າ: ຜູ້ຂັບລົດ ແລະນັກຂ່າວ 40 ກວ່າທ່ານ ຈາກຈີນແລະອາຊຽນໄດ້ຂັບລົດອອກຈາກເຂດກວາງຊີ ສປ ຈີນເມື່ອວັນທີ 11 ທັນວານີ້ ແລະໃຊ້ເວລາ 17 ວັນ, ແລ່ນຜ່ານ 10 ປະເທດອາຊຽນ, ໄລຍະທາງແຂ່ງຂັນປະມານ 10.000 ກິໂລແມັດ ແລະສຸດທ້າຍກໍໄດ້ເດີນທາງຮອດນະຄອນຫຼວງຈາກາຕາ ປະເທດອິນໂດເນເຊຍດ້ວຍຄວາມປອດໄພດີ.