ວັນທີ 27 ທັນວານີ້, ທ່ານ ວລາດີເມຍ ປູຕິນ ປະທານາທິບໍດີຣັດເຊຍໄດ້ຍື່ນເອກະສານສະໝັກຮັບເລືອກຕັ້ງປະທານາທິບໍດີປີ 2018 ໃນຖານະເປັນຜູ້ສະໝັກຮັບເລືອກຕັ້ງເອກະລາດໃຫ້ຄະນະກຳມະການເລືອກຕັ້ງສູນກາງຣັດເຊຍ. ຄະນະກຳມະການດັ່ງກ່າວກ່າວວ່າ: ຈະສຳເລັດການຄົ້ນຄວ້າພິຈາລະນາເອກະສານພາຍໃນ 5 ວັນ.
ກົດໝາຍວ່າດ້ວຍການເລືອກຕັ້ງຂອງຣັດເຊຍລະບຸວ່າ: ຜູ້ສະໝັກຮັບເລືອກຕັ້ງປະທານາທິບໍດີສາມາດເຂົ້າຮ່ວມການເລືອກຕັ້ງໂດຍຜ່ານສອງຊ່ອງທາງຄື:ການສະເໜີຊື່ຈາກພັກການເມືອງແລະສະເໜີດ້ວຍຕົນເອງ. ພັກການເມືອງສາມາດສະເໜີຊື່ຜູ້ສະໝັກຮັບເລືອກຕັ້ງໃນກອງປະຊຸມໃຫຍ່ຜູ້ແທນຂອງຕົນ, ສ່ວນຜູ້ສະໝັກຮັບເລືອກຕັ້ງຈຳເປັນຕ້ອງຮຽກໂຮມໜ່ວຍທີີ່ມີສະມາຊິກຈຳນວນບໍ່ໜ້ອຍກວ່າ 500 ຄົນ,ພ້ອມທັງເກັບກຳລາຍເຊັນຈາກຜູ້ສະໜັບສະໜູນ 300.000 ຄົນ,ສ່ວນລາຍເຊັນທີ່ເກັບກຳໄດ້ຢູ່ທຸກເຂດນັ້ນບໍ່ໃຫ້ຫຼາຍກວ່າ 7.500 ລາຍເຊັນ.
ຫວ່າງມໍ່ໆມານີ້, ທ່ານ ປູຕິນ ໄດ້ປະກາດຈະເຂົ້າຮ່ວມການເລືອກຕັ້ງປະທານາທິບໍດີໃນຖານະເປັນຜູ້ສະໝັກຮັບເລືອກຕັ້ງເອກະລາດ. ໃນວັນທີ 26 ທັນວານີ້, ຜູ້ສະໜັບສະໜູນທ່ານ ປູຕິນ 668 ຄົນໄດ້ຈັດກອງປະຊຸມ ເພື່ອສ້າງໜ່ວຍການແຂ່ງຂັນເລືອກຕັ້ງ,ສະເໜີທ່ານ ປູຕິນ ເຂົ້າຮ່ວມການເລືອກຕັ້ງປະທານາທິບໍດີ.