ວັນທີ 27 ທັນວານີ້, ໜັງສືພິມບາງໂພສກອກໄທລາຍງານວ່າ: ເພື່ອຫຼຸດຕົ້ນທຶນໂຄງການ, ລົດໄຟຄວາມໄວສູງບາງກອກ-ຊຽງໄໝ່ຂອງໄທທີ່ຮັບເໝົາໂດຍຍີ່ປຸ່ນຈຳເປັນຕ້ອງຫຼຸດຄວາມໄວລົງ. ທ່ານສົມຄິດ ຈະຕຸສິພິທັກ ຮອງນາຍົກລັດຖະມົນຕີໄທກ່າວວ່າ: ທ່ານປຣະຢຸດ ຈັນໂອຊາ ນາຍົກລັດຖະມົນຕີໄທໄດ້ຊີ້ໃຫ້ກະຊວງຄົມມະນາຄົມໄທຊອກຫາວິທີຫຼຸດຄວາມໄວລົງຈາກ 300 ກິໂລແມັດຕໍ່ຊົ່ວໂມງເປັນ 180-200 ກິໂລແມັດຕໍ່ຊົ່ວໂມງ.
ທ່ານກ່າວຕື່ມວ່າ: ກ່ອນໜ້ານີ້ເຫັນວ່າ ໂຄງການດັ່ງກ່າວເປັນຕາລົງທຶນ ເນື່ອງຈາກສາມາດຕິດຕໍ່ກັບປະເທດຈີນໂດຍຜ່ານແຂວງຢຸນນານ, ແຕ່ປັດຈຸບັນນີ້ ຈີນກຳລັງກໍ່ສ້າງລົດໄຟເຊື່ອມຕໍ່ລາວ ແລະໄທ ເຊິ່ງຈະເຊື່ອມຕໍ່ກັບລົດໄຟຄວາມໄວສູງໄທ-ຈີນຢູ່ແຂວງໜອງຄາຍ. ສະນັ້ນ, ໂຄງການລົດໄຟຄວາມໄວສູງບາງກອກ-ຊຽງໄໝ່ຄວນກວດກາຄືນ, ຍ້ອນວ່າມັນບໍ່ສາມາດເຊື່ອມຕໍ່ກັບແຂວງອື່ນໆ ຫຼື ປະເທດທີ່ອ້ອມຂ້າງໄດ້.