ວັນທີ 31 ທັນວາປີ 2017 ນີ້, ທ່ານສີຈິ້ນຜິງ ປະທານປະເທດຈີນແລະທ່ານວລາດີເມຍ ປູຕິນ ປະທານາທິບໍດີຣັດເຊຍໄດ້ສົ່ງໂທລະເລກອວຍພອນປີໃໝ່ເຊິ່ງກັນແລະກັນ.
ໂທລະເລກຂອງທ່ານສີຈິ້ນຜິງຂຽນວ່າ: ເມື່ອຫວນຄືນປີ 2017, ສາຍພົວພັນຄູ່ຮ່ວມປະສານງານຍຸດທະສາດຮອບດ້ານລະຫວ່າງຈີນ-ຣັດເຊຍທີ່ມີລະດັບສູງຢູ່ນັ້ນໄດ້ມີການຂະຫຍາຍຕົວໃໝ່ທີ່ມີຄວາມໝາຍສຳຄັນອີກ. ສອງຝ່າຍໄດ້ຮັກສາການປະສານສົມທົບກັນຢ່າງໃກ້ຊິດແລະມີປະສິດທິຜົນໃນວຽກງານສາກົນແລະພາກພື້ນ ເຊິ່ງໄດ້ປະກອບສ່ວນທີ່ສຳຄັນເຂົ້າໃນການຮັກສາສັນຕິພາບແລະສະຖຽນລະພາບຂອງໂລກ.
ທ່ານສີຈິ້ນຜິງຊີ້ໃຫ້ເຫັນວ່າ: ໃນປີໃໝ່ 2018ທີ່ຈະມາເຖິງ, ຂ້າພະເຈົ້າຍິນດີຮ່ວມກັບທ່ານພະຍາຍາມຮ່ວມເພື່ອນຳພາການເສີມຂະຫຍາຍສາຍພົວພັນລະຫວ່າງສອງປະເທດໃຫ້ໄດ້ຮັບຜົນສຳເລັດໃໝ່. ຂ້າພະເຈົ້າເຊື່ອໝັ້ນວ່າ: ກິດຈະກຳປີແລກປ່ຽນຮ່ວມມືລະຫວ່າງທ້ອງຖິ່ນຈີນ-ຣັດເຊຍທີ່ຈະຈັດຂຶ້ນໃນປີ 2018 ແລະ2019ນັ້ນຈະເປີດກວ້າງແລະລົງເລິກການໄປມາຫາສູ່ກັນລະຫວ່າງທ້ອງຖິ່ນຂອງສອງປະເທດຢ່າງຮອບດ້ານແນ່ນອນ.
ໂທລະເລກອວຍພອນຂອງທ່ານປູຕິນລະບຸວ່າ: ໃນປີ 2017 ທີ່ໃກ້ຈະຜ່ານພົ້ນໄປ, ສາຍພົວພັນຣັດເຊຍ-ຈີນຂະຫຍາຍຕົວໂດຍໄດ້ຮັບຜົນສຳເລັດໃໝ່. ສອງປະເທດໄດ້ປະສານງານຢ່າງມີປະສິດທິຜົນໃນວຽກງານສາກົນ ເຊິ່ງໄດ້ປະກອບສ່ວນທີ່ສຳຄັນເຂົ້າໃນການແກ້ໄຂບັນຫາຈຸດຮ້ອນສາກົນ. ພວກຂ້າພະເຈົ້າຈະພະຍາຍາມຮ່ວມກັບຈີນເພື່ອເຮັດໃຫ້ສາຍພົວພັນຄູ່ຮ່ວມປະສານງານຍຸດທະສາດຮອບດ້ານຣັດເຊຍ-ຈີນຂະຫຍາຍຕົວກ້າວສູ່ລວງເລິກແລະສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດທີ່ມີໄມຕີຈິດມິດຕະພາບກັນ.