ກະຊວງພາຍໃນຝຣັ່ງ ໄດ້ຖະແຫຼງຂ່າວໃນວັນທີ 29 ທັນວານີ້ວ່າ: ລັດຖະບານຈະໃຊ້ມາດຕະການຕ່າງໆ ໃນວັນທີ 31 ເດືອນດຽວກັນ ເພື່ອເພີ່ມທະວີການປ້ອງກັນຄວາມໝັ້ນຄົງ ໂດຍໄດ້ຈັດວາງເຈົ້າໜ້າທີ່ຮັກສາຄວາມໝັ້ນຄົງແລະຮັບມືສຸກເສີນເກືອບ 140.000 ຄົນ ເພື່ອຮັບປະກັນຄວາມປອດໄພຂອງປະຊາຊົນໃນໄລຍະປີໃໝ່ສາກົນ.
ຖະແຫຼງຂ່າວລະບຸວ່າ: ໃນວັນທີ 31 ທັນວານີ້, ທົ່ວປະເທດຝຣັ່ງຈະປະຕິບັດແຜນການທີ່ແນໃສ່ເພີ່ມທະວີການລະວັງແລະຕ້ານລັດທິກໍ່ການຮ້າຍ ໂດຍຕົ້ນຕໍຮັບປະກັນຄວາມປອດໄພຕໍ່ສະຖານທີ່ທີ່ມີຄົນເຕົ້າໂຮມກັນ ເປັນຕົ້ນ ຮ້ານສັບພະສິນຄ້າຂະໜາດໃຫຍ່, ສະໜາມກິລາ ແລະໂຮງລະຄອນ ແລະຄວາມປອດໄພຂອງພື້ນຖານໂຄງລ່າງການຄົມມະນາຄົມ.
ນອກນີ້, ອີງຕາມກົດໝາຍຕ້ານລັດທິກໍ່ການຮ້າຍຂອງຝຣັ່ງສະບັບໃໝ່ ທີ່ໄດ້ຮັບຮອງໃນທ້າຍເດືອນຕຸລາປີນີ້ ພາກສ່ວນທີ່ກ່ຽວຂ້ອງຈະສ້າງເຂດປ້ອງກັນຢູ່ເຂດສຳຄັນຕ່າງໆທີ່ມີຄົນເຕົ້າໂຮມກັນ ເຊັ່ນ ຖະໜົນແຊມລີຣີ ນະຄອນຫຼວງປາຣີເປັນຕົ້ນ.
ຖະແຫຼງຂ່າວຍັງລະບຸວ່າ: ລັດຖະບານຝຣັ່ງຍັງຈະໃຊ້ຫຼາຍມາດຕະການ ເພື່ອປ້ອງກັນບໍ່ໃຫ້ມີການຂັບລົດຫຼັງດື່ມເຫຼົ້າ ເພື່ອຮັບປະກັນຄວາມປອດໄພດ້ານການຄົມມະນາຄົມ ແລະປ້ອງກັນບໍ່ໃຫ້ເກີດເຫດການໃຊ້ຄວາມຮຸນແຮງຢູ່ກາງເມືອງໃນໄລຍະປີໃໝ່.