ວັນທີ 1 ມັງກອນນີ້, ທ່ານກິມເຈິງອຸນ ຜູ້ນຳສູງສຸດສປປເກົາຫຼີຢຶນຢັນຂະນະກ່າວຄຳອວຍພອນປີໃໝ່ວ່າ, ສປປເກົາຫຼີອາດຈະສົ່ງຄະນະຜູ້ແທນເຂົ້າຮ່ວມງານກິລາໂອແລມປິກລະດູໜາວທີ່ຈະຈັດຂຶ້ນຢູ່ພຽງຊາງຂອງສ.ເກົາຫຼີໃນໄວໆນີ້, ແລະມີຄວາມອາດເປັນໄປໄດ້ທີ່ເຈົ້າໜ້າທີ່ສອງປະເທດສປປເກົາຫຼີແລະສ.ເກົາຫຼີພົບປະແລກປ່ຽນຢ່າງຮີບດ່ວນກ່ຽວກັບບັນຫາດັ່ງກ່າວ.
ທັງນີ້ທ່ານກິມເຈິງອຸນໄດ້ຢືນຢັນຂະນະກ່າວປາໄສຜ່ານໂທລະພາບສູນກາງສປປເກົາຫຼີວ່າ, ປີນີ້, ສປປເກົາຫຼີຈະສະຫຼອງການສ້າງຕັ້ງປະເທດຄົບຮອບ 70 ປີແລະສ.ເກົາຫຼີກໍຈະຈັດງານກິລາໂອແລມປິກລະດູໜາວ, ຈຶ່ງແມ່ນປີທີ່ມີຄວາມໝາຍຕໍ່ສອງປະເທດ. ຂະນະທີ່ງານກິລາໂອແລມປິກລະດູໜາວທີ່ຈະຈັດຂຶ້ນຢູ່ສ.ເກົາຫຼີໃນໄວໆນີ້ກກໍເປັນໂອກາດດີທີ່ສະແດງໃຫ້ເຫັນຖານະຊົນຊາດຕົນ, ສະນັ້ນ, ສປປເກົາຫຼີຫວັງຢ່າງຈິງໃຈວ່າງານກິລາໂອແລມປິກລະດູໜາວຄັ້ງນີ້ຈະປະສົບຜົນສຳເລັດ.
ທ່ານກິມເຈິງອຸນກ່າວຕື່ມວ່າ, ເພື່ອປັບປຸງການພົວພັນລະຫວ່າງເໜືອໃຕ້ໃຫ້ດີຂຶ້ນ, ແລະເພື່ອຮັບປະກັນສອງຝ່າຍເໜືອໃຕ້ຈະຈັດກິດຈະກຳສຳຄັນຕາມແຜນການ, ກ່ອນອື່ນຄວນຜ່ອນຄາຍສະຖານະການເຄັ່ງຕຶງທາງການທະຫານລະຫວ່າງເໜືອໃຕ້ແລະສ້າງສະພາບແວດລ້ອມສັນຕິພາບຢູ່ແຫຼມເກົາຫຼີ, ຢຸດການຊ້ອມຮົບສົງຄາມນິວເຄຼຍໃດໆທີ່ດຳເນີນຢູ່ແຫຼມເກົາຫຼີ, ບໍ່ກະທຳສິ່ງທີ່ເຮັດໃຫ້ສະຖານະການເຄັ່ງຕຶງຂຶ້ນແລະຕັ້ງໜ້າສ້າງບັນຍາກາດຄວາມປອງດອງກັນຂອງຊົນຊາດ.
