ຕາມຂ່າວCRI: ວັນທີ 1 ມັງກອນີ້, ທ່ານ ສີຈິ້ນຜິງ ປະທານປະເທດຈີນແລະທ່ານ ຈາຄົບ ຈູມາ ປະທານາທິບໍດີອາຟຣິກາໃຕ້ ໄດ້ສົ່ງໂທລະເລກອວຍພອນເຊິ່ງກັນແລະກັນເພື່ອສະຫຼອງການສ້າງສາຍພົວພັນທາງການທູດລະຫວ່າງສອງປະເທດຄົບຮອບ 20 ປີ.
ໃນໂທລະເລກ, ທ່ານ ສີຈິ້ນຜິງ ຊີ້ວ່າ, ໃນ 20 ປີຜ່ານມາ, ພາຍໃຕ້ຄວາມພະຍາຍາມຮ່ວມຂອງສອງຝ່າຍ,ການພົວພັນລະຫວ່າງສອງປະເທດໄດ້ຂະຫຍາຍຕົວເຂົ້າສູ່ລວງເລິກ,ໄດ້ບັນລຸການກ້າວກະໂດດທີ່ສຳຄັນແລະຍິ່ງໃຫຍ່ ໂດຍໄດ້ພັດທະນາຈາກການພົວພັນຄູ່ຮ່ວມມືຮອດການພົວພັນຄູ່ຮ່ວມຍຸດທະສາດແລະກ້າວສູ່ການພົວພັນຄູ່ຮ່ວມຍຸດທະສາດຮອບດ້ານອີກ. ພ້ອມທັງຍິນດີຮ່ວມກັບທ່ານປະທານາທິບໍດີພະຍາຍາມຊຸກຍູ້ການພົວພັນລະຫວ່າງສອງປະເທດໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ,ເພື່ອສ້າງຄວາມສົມບູນພູນສຸກໃຫ້ແກ່ສອງປະເທດກໍຄືປະຊາຊົນທັງສອງຝ່າຍ.
ທ່ານ ຈູມາ ໄດ້ກ່າວໃນໂທລະເລກວ່າ: ໃນ 20 ປີຜ່ານມາ, ບົນພື້ນຖານການພົວພັນທີ່ມີໄມຕີຈິດມິດຕະພາບອັນເປັນມູນເຊື້ອແລະຄວາມໄວ້ເນື້ອເຊື່ອໃຈກັນ, ການຮ່ວມມືລະຫວ່າງສອງປະເທດໄດ້ຮັບໝາກຜົນທີ່ໜ້າຊົມເຊີຍ. ຂ້າພະເຈົ້າຄອງຄອຍຈະເດີນທາງໄປຈີນເພື່ອເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືຈີນ-ອາຟຣິກາຄັ້ງໃໝ່ໃນເດືອນກັນຍາປີນີ້. ແລະຫວັງຢາກຖືໂອກາດຄົບຮອບ 20 ປີຄັ້ງນີ້ ເພີ່ມທະວີການພົວພັນທີ່ມີໄມຕີຈິດມິດຕະພາບລະຫວ່າງສອງປະເທດ, ເປີດກວ້າງການຮ່ວມມື ເພື່ອບັນລຸຕ່າງຝ່າຍຕ່າງມີຜົນປະໂຫຍດ.