ວັນທີ 1 ມັງກອນນີ້, ສື່ມວນຊົນໄດ້ຮັບແຈ້ງຂ່າວຈາກບໍລິສັດທາງລົດໄຟຈີນວ່າ: ໃນປີຜ່ານມາ, ທາງລົດໄຟທົ່ວປະເທດຈີນໄດ້ບັນລຸການລົງທຶນເຖິງ 801 ຕື້ຢວນ. ທາງລົດໄຟຄວາມໄວສູງປາວຈີ່-ລານໂຈ່ວ, ຕອນທີ່ຊີ່ອ່ານ-ຈ່ຽງໂຢຂອງທາງລົດໄຟຄວາມໄວສູງຊີ່ອ່ານ-ເຊິງຕູ່, ເສັ້ນທາງລົດໄຟຄວາມໄວສູງສືເຈ່ຍຈ່ວງ-ຈີນານ ແລະອື່ນໆໄດ້ເປີດນຳໃຊ້ ເຊິ່ງມີຄວາມຍາວທັງໝົດ 3038 ກິໂລແມັດ. ຮອດທ້າຍປີ 2017, ເສັ້ນທາງລົດໄຟໄດ້ເປີດນຳໃຊ້ເຖິງ 1 ແສນ 2 ໝື່ນ 7 ພັນກິໂລແມັດ, ໃນນັ້ນ ທາງລົດໄຟຄວາມໄວສູງມີເຖິງ 2 ໝື່ນ 5 ພັນກິໂລແມັດ.
ເຈົ້າໜ້າທີ່ທີ່ກ່ຽວຂ້ອງຂອງບໍລິສັດທາງລົດໄຟຈີນກ່າວວ່າ: ໃນປີ 2018, ບໍລິສັດຕົນມີ 49 ໂຄງການໃໝ່ໄດ້ຜ່ານການຮັບຮອງ ແລະມີ 35 ໂຄງການໄດ້ດຳເນີນການກໍ່ສ້າງ. ການກໍ່ສ້າງທາງລົດໄຟຄວາມໄວສູງປັກກິ່ງ-ຈ່າງເຈ່ຍໂຂ, ການປັບປຸງແຜນການເສັ້ນທາງລົດໄຟເຂດໃໝ່ສົງອ່ານ, ແຜນການກໍ່ສ້າງຈຸດສູນກາງເສັ້ນທາງລົດໄຟເຂດໃຈກາງປັກກິ່ງ-ທຽນສິນ-ເຮີເປີຍ ແລະວຽກງານອື່ນໆກໍໄດ້ຮັບຄວາມຄືບໜ້າທີ່ສຳຄັນ ເຊິ່ງໄດ້ສ້າງພື້ນຖານຂອງການກໍ່ສ້າງໂຄງການໃນຕໍ່ໜ້າໄວ້ຮຽບຮ້ອຍແລ້ວ.
 |
