ເພື່ອປັບປຸງຄຸນນະພາບອາກາດໃຫ້ດີຂຶ້ນ ນະຄອນຫຼວງປັກກິ່ງໄດ້ປະກາດໃຊ້ "ແຜນການດຳເນີນງານເພື່ອຄວາມສະອາດຂອງອາກາດນະຄອນຫຼວງປັກກິ່ງແຕ່ປີ 2013-2017" ເມື່ອປີ 2013 ຢ່າງເປັນທາງການ. ວັນທີ 3 ມັງກອນນີ້, ທ່ານຫຼິວປາວຊ້ຽນ ຮອງຫົວໜ້າສູນຕິດຕາມວັດແທກແລະອະນຸລັກສິ່ງແວດລ້ອມນະຄອນຫຼວງປັກກິ່ງ ໄດ້ເປີດເຜີຍວ່າ: ປີ 2017 ທີ່ຫາກໍຜ່ານພົ້ນໄປ, ຄວາມເຂັ້ມຂຸ້ນຂອງລະອອງຝຸ່ນທີ່ເສັ້ນຜ່າກາງຕ່ຳກວ່າ ຫຼືເທົ່າກັບ 2,5 ມີຄຣອນ ຫຼື PM2.5 ຂອງນະຄອນຫຼວງປັກກິ່ງສະເລ່ຍແລ້ວຢູ່ໃນລະດັບ 58 ມີໂຄຣກຣາມຕໍ່ແມັດກ້ອນ ຫຼຸດລົງ 32 ມີໂຄຣກຣາມຕໍ່ແມັດກ້ອນ ຫຼື 35,6% ເມື່ອທຽບໃສ່ລະດັບ 90 ມີໂຄຣກຣາມຕໍ່ແມັດກ້ອນຂອງປີ 2013.
ທ່ານຫຼິວປາວຊ້ຽນ ກ່າວວ່າ: ແຕ່ປີ 2013 ຫາປີ 2017, ຈຳນວນມື້ທີ່ຄຸນນະພາບຂອງອາກາດນະຄອນຫຼວງປັກກິ່ງໄດ້ຕາມມາດຕະຖານ ເພີ່ມຂຶ້ນ 50 ວັນ; ຈຳນວນມື້ທີ່ຄຸນນະພາບຂອງອາກາດຢູ່ໃນລະດັບດີເລີດ ໄດ້ເພີ່ມຂຶ້ນ 25 ວັນ; ຈຳນວນມື້ທີ່ອາກາດມົນລະພິດໜັກໜ່ວງຫຼຸດລົງ 35 ວັນ ເຊິ່ງອັດຕາການເກີດມົນລະພິດໜັກໜ່ວງໄດ້ຫຼຸດລົງຢ່າງຈະແຈ້ງ.
ທ່ານຫຼິວປາວຊ້ຽນ ເນັ້ນວ່າ: ເຖິງວ່າຄວາມເຂັ້ມຂຸ້ນຂອງມົນລະພິດທາງອາກາດຢູ່ນະຄອນຫຼວງປັກກິ່ງໄດ້ຫຼຸດລົງຢ່າງຕໍ່ເນື່ອງກໍຕາມ, ແຕ່ຢາກຈະປັບປຸງຄຸນນະພາບຂອງອາກາດໃຫ້ດີກວ່າເກົ່າຈາກຂັ້ນພື້ນຖານນັ້ນ ຍັງຄົງເປັນຂະບວນການທີ່ຕ້ອງໃຊ້ເວລາດົນນານ, ມີຄວາມສັບສົນ ແລະ ມີຄວາມຫຍຸ້ງຍາກຕ່າງໆ.