ວັນທີ 5 ມັງກອນນີ້, ງານດົນຕີອວຍພອນປີໃໝ່ 2018 - ການສຳຜັດກັບອາຊຽນຢ່າງໃກ້ຊິດທີ່ສູນແລກປ່ຽນວັດທະນະທຳສາກົນກວາງຊີ ສະມາຄົມມິດຕະພາບຕໍ່ຕ່າງປະເທດປະຊາຊົນເມືອງນານນິງ ແລະ ຫໍພິພິທະພັນຂອງເມືອງນານນິງຮ່ວມກັນເປັນເຈົ້າພາບໄດ້ຈັດຂຶ້ນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີຈີນ ເຂົ້າຮ່ວມໂດຍທູຕານຸທູດຂອງສະຖານກົງສຸນໃຫຍ່ປະເທດອາຊຽນປະຈຳນານນິງເຊັ່ນ: ລາວ,ມາເລເຊຍ, ມຽນມາ,ໄທ,ຫວຽດນາມແລະກຳປູເຈຍເປັນຕົ້ນກໍ່ຄືຜູ້ແທນນັກສຶກສາປະເທດອາຊຽນທີ່ຮຽນຢູ່ຈີນ.
ໃນງານດົນຕີ, ນັກດົນຕີ 8 ທ່ານຈາກໂຮງລະຄອນຟ້ອນກວາງຊີໄດ້ບັນເລງເສບດົນຕີພື້ນເມືອງຂອງຈີນແລະ 10 ປະເທດອາຊຽນດ້ວຍເຄື່ອງດົນຕີພື້ນເມືອງຂອງຈີນ.
ທ່ານ ກ່າວໂສງ ຮອງຫົວໜ້າຄະນະປະຈຳສະພາຜູ້ແທນປະຊາຊົນເຂດປົກຄອງຕົນເອງເຜົ່າຈວ້າງກວາງຊີ, ປະທານສູນແລກປ່ຽນວັດທະນະທຳສາກົນກວາງຊີກ່າວວ່າ: ເຂດກວາງຊີໄດ້ມີສາຍພູແລະແມ່ນ້ຳຕິດຈອດກັນກັບປະເທດອາຊຽນ,ຫວັງວ່າຜ່ານຈາກງານດົນຕີຄັ້ງນີ້,ຈະສາມາດເພີ່ມທະວີການແລກປ່ຽນດ້ານວັດທະນະທຳລະຫວ່າງສອງຝ່າຍ,ຊຸກຍູ້ຄວາມເຂົ້າໃຈແລະມິດຕະພາບລະຫວ່າງຈີນກັບບັນດາປະເທດອາຊຽນ,ຊຸກຍູ້ຄວາມເຂົ້າໃຈລະຫວ່າງປະຊາຊົນຂອງສອງຝ່າຍ.
ເຂດກວາງຊີແມ່ນແນວໜ້າທີ່ເຊື່ອມຕໍ່ຈີນກັບອາຊຽນ,ກໍ່ແມ່ນເຂດທີ່ໄດ້ຮັບຄວາມນິຍົມຊົມຊອບຫຼາຍຈາກນັກສຶກສາຂອງປະເທດອາຊຽນທີ່ໄປຮຽນຢູ່ຈີນ, ການແລກປ່ຽນນັກສຶກສາລະຫວ່າງສອງຝ່າຍໄດ້ບັນລຸຈຳນວນຫຼາຍກວ່າ 1 ໝື່ນຄົນແລ້ວ.