ວັນທີ 5 ມັງກອນນີ້, ໃນກອງປະຊຸມຂ່າວທີ່ຈັດຂຶ້ນຢູ່ທີ່ປັກກິ່ງ, ທ່ານເກີງສວງ ໂຄສົກກະຊວງການຕ່າງປະເທດຈີນໃຫ້ຮູ້ວ່າ, ໂດຍຕອບສະໜອງຕາມຄຳເຊີນຂອງທ່ານສີຈີ້ນຜີງ ປະທານປະເທດຈີນ, ທ່ານເອມະນຸເອວ ມາກາຣົນ ປະທານາທິບໍດີຝຣັ່ງຈະຢ້ຽມຢາມຈີນທາງລັດຖະກິດແຕ່ວັນທີ 8 ຫາວັນທີ 10 ມັງກອນນີ້,ສອງຝ່າຍຈະແລກປ່ຽນຄວາມຄິດຄວາມເຫັນຢ່າງເລິກເຊິ່ງຕໍ່ການພົວພັນລະຫວ່າງສອງປະເທດ ແລະ ບັນຫາທີ່ສົນໃຈນຳກັນ.
ທ່ານເກີງສວງກ່າວວ່າ, ການຢ້ຽມຢາມຂອງທ່ານປະທານາທິບໍດີມາກາຣົນເທື່ອນີ້ແມ່ນທ່ານຢ້ຽມຢາມຈີນທາງລັດຖະກິດເປັນເທື່ອທຳອິດ, ມີຄວາມໝາຍສຳຄັນເໝືອນດັ່ງຂົວຕໍ່ໃນການພົວພັນຈີນ-ຝຣັ່ງ. ໃນໄລຍະຢ້ຽມຢາມ, ປະມຸກລັດສອງປະເທດຈະຫວນຄືນ ແລະ ຈ້ອງມອງການພົວພັນຈີນ-ຝຣັ່ງຢ່າງຮອບດ້ານ, ບົນພື້ນຖານທີ່ສະຫຼຸບບົດຮຽນທີ່ໄດ້ມີຢູ່ແລ້ວ, ຍົກລະດັບຄວາມໄວ້ເນື້ອເຊື່ອໃຈທາງການເມືອງ, ຮັດແໜ້ນຄວາມຮັບຮູ້ຄືກັນດ້ານຍຸດທະສາດ, ຊີ້ນຳພາການແລກປ່ຽນ ແລະ ການຮ່ວມມືລະຫວ່າງສອງປະເທດໃນຂົງເຂດຕ່າງໆ ເຊັ່ນ ການເມືອງ, ເສດຖະກິດການຄ້າ ແລະ ວັດທະນະທຳເປັນຕົ້ນ, ຈັດວາງແຜນການ, ຊຸກຍູ້ການພົວພັນຄູ່ຍຸດທະສາດຮອບດ້ານລະຫວ່າງຈີນ-ຝຣັ່ງທີ່ສະໜິດແໜ້ນ ແລະ ຖາວອນນັ້ນກ້າວເຂົ້າສູ່ລະດັບໃໝ່.