ຕົວເລກສະຖິຕິຂອງສະຫະປະຊາຊາດສະແດງໃຫ້ເຫັນວ່າ, ພາຍຫຼັງລັດວີເຂົ້າເປັນສະມາຊິກສະຫະພາບເອີລົບໃນປີ 2004 ເປັນຕົ້ນມາ, ປະຊາກອນໄດ້ຫຼຸດລົງເກືອບ 20%, ໃນນັ້ນສ່ວນຫຼາຍໄປຊອກວຽກເຮັດງານທຳຢູ່ອັງກິດ, ອຽກລັງ, ເຢຍລະມັນ ແລະປະເທດສະຫະພາບເອລົບອື່ນໆທີ່ຈະເລີນກວ່າ.
ອີງຕາມບົດລາຍງານທີ່ເຜີຍແຜ່ໃນຫວ່າງກ່ອນນີ້ບໍ່ດົນ, ປີ 2000ລັດວີມີປະຊາກອນປະມານ 2,38ລ້ານຄົນ, ແຕ່ເມື່ອຮອດຕົ້ນປີ 2018ເຫຼືອແຕ່ 1,95ລ້ານຄົນເທົ່ານັ້ນ. ຕົວເລກສະຖິຕິຂອງສະຫະປະຊາຊາດສະແດງໃຫ້ເຫັນວ່າ, ນັບແຕ່ເຂົ້າເປັນສະມາຊິກສະຫະພາບເອີລົບເປັນຕົ້ນມາ, ປະຊາກອນລັດວີໄດ້ຫຼຸດລົງ 18%.
ບັນຫາທີ່ປະຊາກອນຫຼຸດໜ້ອຍລົງຂອງລັດວີຍິ່ງພົ້ນເດັ່ນກວ່າຢູ່ເຂດຊົນນະບົດໃກ້ຊາຍແດນຣັດເຊຍ, ເຊິ່ງຢູ່ບ່ອນນັ້ນລາຍຮັບສະເລ່ຍຕໍ່ຫົວຄົນເປັນພຽງແຕ່ເຄິ່ງໜຶ່ງຂອງລາຍຮັບເຂດອື່ນໆຂອງລັດວີ.
ນອກນີ້, ຊາວໜຸ່ມຈຳນວນໜຶ່ງໄປຊອກວຽກເຮັດງານທຳຢູ່ນະຄອນຫຼວງລີກາຂອງລັດວີ, ເຊິ່ງເຮັດໃຫ້ປະຊາກອນຂອງລີກາໄດ້ເພີ່ມຂຶ້ນຈຳນວນໜຶ່ງ, ແຕ່ຄົນສ່ວນຫຼາຍໄດ້ເລືອກໄປຊອກວຽກຢູ່ຕ່າງປະເທດ.
ເຈົ້າໜ້າທີ່ລັດຖະບານລັດວີກ່າວວ່າ, ຊາວຍົກຍ້າຍຖິ່ນຖານຍ້ອນສາເຫດເສດຖະກິດບໍ່ແມ່ນສາເຫດພຽງຢ່າງດຽວທີ່ເຮັດໃຫ້ປະຊາກອນໜ້ອຍລົງ, ອັດຕາການເກີດຕ່ຳ ແລະອັດຕາການຕາຍສູງ ກໍເປັນສາເຫດສຳຄັນທີ່ເຮັດໃຫ້ປະຊາກອນຫຼຸດໜ້ອຍລົງ.
ຊ່ຽວຊານຊີ້ວ່າ, ປະຊາກອນຫຼຸດລົງໄວເກີນໄປໄດ້ກາຍເປັນບັນຫາອັນໜັກໜ່ວງທີ່ກະທົບເຖິງການພັດທະນາຂອງລັດວີ.
 |
