ພິທີເປີດຊຸດສຳມະນານັກທຸລະກິດ "ໜຶ່ງແລວທາງໜຶ່ງເສັ້ນທາງ"ພາຍໃຕ້ການເປັນເຈົ້າພາບຂອງສະຫະພັນຊາວມາເລເຊຍເຊື້ອສາຍຈີນ ເຊິ່ງເປັນພັກຮ່ວມລັດຖະບານມາເລເຊຍໄດ້ຈັດຂຶ້ນຢູ່ມະຫາວິທະຍາໄລຣາມານມາເລເຊຍໃນວັນທີ 6 ມັງກອນນີ້ໂດຍມີນັກວິຊາການແລະຜູ້ຕາງໜ້ານັກທຸລະກິດຈີນແລະມາເລເຊຍ 100 ກວ່າທ່ານເຂົ້າຮ່ວມ.
ທ່ານໂຮກອກຊຸງ ຮອງປະທານສະຫະພັນຊາວມາເລເຊຍເຊື້ອສາຍຈີນປະກອບຄຳເຫັນໃນໂອກາດເປີດຊຸດສຳມະນາວ່າ: ມິດຕະພາບມາເລເຊຍ-ຈີນມີປະຫວັດສາດອັນຍາວນານ, ຫຼັງຈາກຈີນສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ແລ້ວ, ຝ່າຍຕ່າງໆຂອງມາເລເຊຍກໍໄດ້ຕັ້ງໜ້າເຂົ້າຮ່ວມ, ແລະການຮ່ວມມືລະຫວ່າງສອງປະເທດໃນດ້ານເສດຖະກິດການຄ້າ, ວັດທະນະທຳ,ການສຶກສາແລະຂົງເຂດອື່ນໆໄດ້ຮັບຜົນສຳເລັດຢ່າງຫຼວງຫຼາຍ ແລະມີທ່າແຮງບົ່ມຊ້ອນຢ່າງມະຫາສານ.
ທ່ານຊ້າຍປາວສຽງ ປະທານບໍລິຫານງານສູນ "ໜຶ່ງແລວທາງໜຶ່ງເສັ້ນທາງ"ທີ່ສັງກັດສະຫະພັນຊາວມາເລເຊຍເຊື້ອສາຍຈີນກ່າວວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຂອງຈີນໄດ້ສ້າງໂອກາດການຮ່ວມມືຢ່າງໃຫຍ່ຫຼວງໃຫ້ແກ່ປະເທດອາຊຽນເຊິ່ງລວມທັງມາເລເຊຍ.