ວັນທີ 5 ມັງກອນນີ້, ທ່ານໂຈ່ວເຊເວິນ ຮອງລັດຖະມົນຕີກະຊວງຊົນລະປະທານຈີນກ່າວວ່າ: ຈະປະຕິບັດລະບຽບສອບຖາມເຖິງຄວາມຮັບຜິດຊອບຕໍ່ຜູ້ກ່ຽວຕະຫຼອດຊີວິດໃນກໍລະນີທຳລາຍລະບົບນິເວດໜອງນ້ຳ ແລະຈະປະຕິບັດຢ່າງເຂັ້ມງວດ. ທັງນີ້, ເພື່ອເພີ່ມທະວີການຄຸ້ມຄອງ ແລະອະນຸລັກຮັກສາໜອງນ້ຳ. ເມື່ອບໍ່ດົນມານີ້, ລັດຖະບານຈີນໄດ້ອອກແຈ້ງການຮຽກຮ້ອງສ້າງລະບຽບຫົວໜ້າໜ່ວຍງານຮັບຜິດຊອບໜອງນ້ຳຮອບດ້ານໃນທົ່ວປະເທດກ່ອນທ້າຍປີນີ້ ທີ່ແບ່ງອອກເປັນ 4 ຂັ້ນ ຄື ແຂວງ, ເມືອງ, ຕາແສງ ແລະບ້ານ, ໂດຍໃຫ້ຜູ້ຮັບຜິດຊອບວຽກງານພັກ ແລະການບໍລິຫານຂອງແຕ່ລະຂັ້ນດຳລົງຕຳແໜ່ງຫົວໜ້າຄຸ້ມຄອງໜອງນ້ຳ ເພື່ອສ້າງລະບົບທີ່ຖືເອົາລະບຽບຄວາມຮັບຜິດຊອບຂອງຫົວໜ້າພັກ ແລະຫົວໜ້າຝ່າຍບໍລິຫານເປັນໃຈກາງນັ້ນໃຫ້ສົມບູນ.
ຕາມການແຈ້ງການດັ່ງກ່າວຊີ້ໃຫ້ເຫັນໜ້າທີ່ຕົ້ນຕໍຂອງການຈັດຕັ້ງປະຕິບັດລະບຽບຫົວໜ້າການຄຸ້ມຄອງໜອງນ້ຳ ເຊິ່ງກວມເອົາການຄວບຄຸມເຂດນ້ຳຢ່າງເຂັ້ມງວດ, ເພີ່ມທະວີການຮັກສາຄຸ້ມຄອງແຄມຝັ່ງໜອງນ້ຳ ແລະອື່ນໆ.
ຕາມຄວາມຮຽກຮ້ອງຕ້ອງການທີ່ລະບຸໃນແຈ້ງການດັ່ງກ່າວ, ອົງການທີ່ກ່ຽວຂ້ອງໃນເຂດຕ່າງໆຄວນເພີ່ມທະວີການຊີ້ນຳແບ່ງປະເພດ, ປັບປຸງການຕິດຕາມກວດກາ, ສອບຖາມຄວາມຮັບຜິດຊອບຢ່າງເຂັ້ມງວດ ແລະປະຕິບັດລະບຽບຄົ້ນຫາຄວາມຮັບຜິດຊອບຕໍ່ຜູ້ກ່ຽວຕະຫຼອດຊີວິດໃນກໍລະນີທີ່ທຳລາຍລະບົບນິເວດໜອງນ້ຳ.
 |
