ກະຊວງພາຍໃນຂອງໄທປະກາດວ່າ, ໃນ "7 ມື້ອັນຕະລາຍ" ຄືນັບແຕ່ວັນທີ 28 ທັນວາປີ 2017 ຫາວັນທີ 3 ມັງກອນປີນີ້, ຢູ່ທົ່ວປະເທດໄດ້ເກີດອຸບັດເຫດຄົມມະນາຄົມ 3841 ຄັ້ງ ສົ່ງຜົນເຮັດໃຫ້ 423 ຄົນເສຍຊີວິດ ແລະ 4005 ຄົນບາດເຈັບ.
ຂໍ້ມູນນີ້ສະແດງໃຫ້ເຫັນວ່າ, ການຂັບລົດຫຼັງດື່ມເຫຼົ້າ ແມ່ນສາເຫດຕົ້ນຕໍທີ່ເຮັດໃຫ້ເກີດອຸບັດເຫດຄົມມະນາຄົມ ເຊິ່ງກວມຫຼາຍກວ່າ 43%, ຖັດຈາກນັ້ນແມ່ນການຂັບລົດເກີນຄວາມໄວຈຳກັດ ໂດຍກວມຫຼາຍກວ່າ 25%.
ປະເທດໄທ ແມ່ນໜຶ່ງໃນປະເທດທີ່ອັດຕາການຕາຍຍ້ອນອຸບັດເຫດຄົມມະນາຄົມສູງກວ່າໝູ່ໃນໂລກ, ໂດຍສະເພາະແມ່ນປີໃໝ່ສາກົນ ແລະ ບຸນຫົດນ້ຳ ທີ່ເປັນໄລຍະເວລາພັກຜ່ອນໃນທຸກໆປີ ເຊິ່ງແມ່ນໄລຍະທີ່ເກີດອຸບັດເຫດຄົມມະນາຄົມເລື້ອຍໆ, ສະນັ້ນ, ສອງໄລຍະພັກດັ່ງກ່າວຈຶ່ງຖືກເອີ້ນວ່າ "7 ມື້ອັນຕະລາຍ".