ວັນທີ 9 ມັງກອນນີ້, ທ່ານດອນ ປຣະມັດວິໄນ ລັດຖະມົນຕີກະຊວງການຕ່າງປະເທດໄທຢືນຢັນຕໍ່ສື່ມວນຊົນວ່າ: ທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີ ຜູ້ທີ່ບໍ່ຮູ້ຂ່າວຄາວໃນຜ່ານມານັ້ນ ປະຈຸບັນນີ້ອາໄສຢູ່ປະເທດອັງກິດ.
ທ່ານດອນ ປຣະມັດວິໄນກ່າວວ່າ: ເດືອນກັນຍາປີຜ່ານມາ, ເຈົ້າໜ້າທີ່ທາງການອັງກິດໄດ້ຢືນຢັນຕໍ່ໄທວ່າ ຍິ່ງລັກຢູ່ອັງກິດ. ລັດຖະບານໄດ້ຍົກເລີກໜັງສືຜ່ານແດນຫຼືພັສປອດ 4 ຫົວຂອງຍິ່ງລັກ, ປັດຈຸບັນຍັງບໍ່ຮູ້ລະອຽດເທື່ອວ່າ ຍິ່ງລັກໄດ້ເຂົ້າປະເທດອັງກິດໃນຖານະໃດ. ທ່ານຍັງກ່າວຕື່ມວ່າ: ໄທຕ້ອງພິຈາລະນາຢ່າງຮອບຄອບໃນເລື່ອງທີ່ຈະນຳສົ່ງນາງຍິ່ງລັກກັບຄືນປະເທດຫຼືບໍ່.
ພັກເພື່ອໄທທີ່ມີສ່ວນພົວພັນກັບຍິ່ງລັກຢ່າງໃກ້ຊິດນັ້ນຖະແຫຼງວ່າ: ຍິ່ງລັກເຄີຍໄດ້ຂໍການປົກປ້ອງທາງການເມືອງຈາກອັງກິດ, ຫາກວ່າໄດ້ຮັບການອະນຸມັດ, ກໍ່ຈະໄດ້ຮັບການປົກປ້ອງເປັນເວລາ 5 ປີ. ທ່ານດອນ ປຣະມັດວິໄນຢືນຢັນວ່າ ກໍລະນີອັງກິດໃຫ້ການປົກປ້ອງທາງການເມືອງແກ່ຍິ່ງລັກນັ້ນຈະບໍ່ມີຜົນກະທົບເຖິງສາຍພົວພັນໄທ-ອັງກິດແຕ່ຢ່າງໃດ.
ກ່ອນໜ້ານີ້, ສື່ສັງຄົມອ໋ອນລາຍໄດ້ໂພສຮູບຖ່າຍຮ່ວມລະຫວ່າງຍິ່ງລັກກັບນັກທ່ອງທ່ຽວໄທຢູ່ອັງກິດ. ເຈົ້າໜ້າທີ່ຕຳຫຼວດໄທໄດ້ສົ່ງເອກະສານໄປຍັງເຈົ້າໜ້າທີ່ອັງກິດຂໍສຳຫຼວດສະພາບການເຂົ້າອອກເມືອງຂອງຍິ່ງລັກ, ແຕ່ ຈົນເຖິງປັດຈຸບັນ, ອັງກິດກໍຍັງບໍ່ທັນໄດ້ໃຫ້ຄຳຕອບເທື່ອ.
 |
