ທ່ານຫຼີ​ເຄີ້​ສຽງ​ພົບ​ປະ​​ກັບ​ທ່ານ​ຮຸນ​ແຊນ
2018-01-11 22:22:56  cri 
ທ່ານຫຼີ​ເຄີ້​ສຽງ ນາ​ຍົກ​ລັດ​ຖະ​ມົນ​ຕີ​ຈີນ​ໄດ້​ພົບ​ປະກັບ​ທ່ານ​ຮຸນ​ແຊນ ນາ​ຍົກ​ລັດ​ຖະ​ມົນ​ຕີ​ກຳ​ປູ​ເຈຍ​ຢູ່​ນະ​ຄອນຫຼວງ​ພະ​ນົມ​ເປັນໃນຕອນ​ເຊົ້າ​ວັນ​ທີ 11 ມັງ​ກອນ​ນີ້​. ທ່ານຫຼີ​ເຄີ້​ສຽງ​ຢືນ​ຢັນ​ວ່າ ຈີນ​ຍິນ​ດີ​ຖື​ສອງ​ປະ​ເທດ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ຄົບ​ຮອບ 60 ປີ​ເປັນ​ໂອ​ກາດ​ທີ່​ດີ ເພື່ອ​ຮ່ວມ​ກັບ​ກຳ​ປູ​ເຈຍ​ສ້າງ​ຄູ່​ຮ່ວມ​ຊາ​ຕາ​ກຳ​ຈີນ-ກຳ​ປູ​ເຈຍ​ທີ່​ມີ​ຄວາມ​ໝາຍ​ຍຸດ​ທະ​ສາດ.

ທ່ານຫຼີ​ເຄີ້​ສຽງ​ຢືນ​ຢັນ​ວ່າ ຈີນ​ຍິນ​ດີ​ສືບ​ຕໍ່​ຮ່ວມ​ກັບ​ກຳ​ປູ​ເຈຍ​​ໄປ​ມາ​ຫາ​ສູ່​ກັນ​ລະ​ຫວ່າງ​ການ​ນຳ​ຂັ້ນ​ສູງ​ຢ່າງ​ໃກ້​ຊິດ, ລົງ​ເລິກ​ການ​ຮ່ວມ​ມື​ຕົວ​ຈິງ​ໃນ​ຂົງ​ເຂດ​ຕ່າງໆ, ຮັດ​ແໜ້ນ​ການ​ແລກ​ປ່ຽນ​ດ້ານ​ວັດ​ທະ​ນະ​ທຳ​ແລະ​ອື່ນໆ ພ້ອມ​ທັງຈະ​ໃຫ້​ການ​ສະ​ໜັບ​ສະ​ໜູນ​ຕາມ​ຄວາມ​ສາ​ມາດ​ຂອງ​ຕົນ​ໃນ​ການ​ພັດ​ທະ​ນາ​ເສດ​ຖະ​ກິດ​ກຳ​ປູ​ເຈຍ​ໂດຍ​ສະ​ເພາະ​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ກຳ​ປູ​ເຈຍ​ໃຫ້​ດີ​ຂຶ້ນ. ທ່ານ​ເນັ້ນ​ວ່າ: ຈີນ​ຍິນ​ດີ​ຮ່ວມ​ກັບ​ກຳ​ປູ​ເຈຍ​ຖື​ການ​ຮ່ວມ​ສ້າງ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ"​ເປັນ​ໂອ​ກາດ, ເພີ່ມ​ທະ​ວີ​ການ​ຮ່ວມ​ມື​ໃນ​ດ້ານ​ເຂດ​ເສດ​ຖະ​ກິດ​ພິ​ເສດ, ພື້ນ​ຖານ​ໂຄງ​ລ່າ​ງ​ຄົມ​ມະ​ນາ​ຄົມ,ກະ​ສິ​ກຳ​ກັບ​ການ​ປຸງ​ແຕ່ງ​ຜະ​ລິດ​ຕະ​ພັນ​ກະ​ສິ​ກຳ​ລະອຽດ, ການ​ທ່ອງ​ທ່ຽວ​ ແລະ​ເປີດກວ້າງ​ການ​ຮ່ວມ​ມື​ດ້ານ​ການ​ສຶກ​ສາ, ວິ​ທະ​ຍາ​ສາດ​ເຕັກ​ໂນ​ໂລ​ຊີ, ສາ​ທາ​ລະ​ນະ​ສຸກ​ແລະ​ການ​ຮ່ວມ​ມື​ລະ​ຫວ່າງ​ທ້ອງ​ຖິ່ນ, ຮ່ວມ​ກັນ​ຈັດ​ກິດ​ຈະ​ກຳ​ຕ່າງໆ​ເພື່ອ​ສະຫຼອງ​ການ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ຈີນ​-ກຳ​ປູ​ເຈຍ​ຄົບ​ຮອບ 60 ປີ ເພື່ອ​ເຮັດ​ໃຫ້​ພື້ນ​ຖານ​ປະ​ຊາ​ມະ​ຕິ​ແຫ່ງ​ມິດ​ຕະ​ພາບ​ຈີນ-ກຳ​ປູ​ເຈຍ​ໝັ້ນ​ຄົງ​ກວ່າ​ເກົ່າ.

ທ່ານ​ຮຸນ​ແຊນ​ຊົມ​ເຊີຍ​ທ່ານ​ນາ​ຍົກຫຼີ​ເຄີ້​ສຽງ​ທີ່​ເດີນ​ທາງ​ຢ້ຽມ​ຢາມ​ກຳ​ປູ​ເຈຍ​ເນື່ອງ​ໃນ​ໂອ​ກາດ​ສອງ​ປະ​ເທດ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ຄົບ​ຮອບ 60 ປີ, ກຳ​ປູ​ເຈຍ​ຂອບ​ໃຈ​ຈີນ​ທີ່​ສະ​ໜັບ​ສະ​ໜູນ​ແລະ​ຊ່ວຍ​ເຫຼືອ​ກຳ​ປູ​ເຈຍ​ໃນ​ໄລ​ຍະ​ຍາວ​ນານ​ມາ​ນີ້ ແລະ​ຍິນ​ດີ​ເປີດກວ້າງ​ການ​ຮ່ວມ​ມື​ໃນ​ຂົງ​ເຂດ​ພື້ນ​ຖານ​ໂຄງ​ລ່າງ,ກະ​ສິ​ກຳ,ທ່ອງ​ທ່ຽວ,​ ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ແລະ​ອື່ນໆ. ຂະ​ນະ​ດຽວ​ກັນ​ກໍ​ຍິນ​ດີ​ຮ່ວມ​ກັບ​ຈີນ​ຈັດ​ກິດ​ຈະ​ກຳ​ສະຫຼອງ​ການ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ລະ​ຫວ່າງ​ສອງ​ປະ​ເທດ​ຄົບ​ຮອບ 60 ປີ​ໃຫ້​ປະ​ສົ​ບ​ຜົນ​ສຳ​ເລັດ​ເພື່ອ​ສືບ​ທອດ​ມິດ​ຕະ​ພາບ​ທີ່​ມີ​ມູນ​ເຊື້ອ​ລະ​ຫວ່າງ​ກຳ​ປູ​ເຈຍ-ຈີນ​ຕະຫຼອດ​ໄປ.

ຫຼັງ​ສຳ​ເລັດ​ການ​ພົບ​ປະ, ທ່ານຫຼີ​ເຄີ້​ສຽງ​ແລະ​ທ່ານ​ຮຸນ​ແຊນ​ໄດ້​ຮ່ວມ​ກັນ​ເປັນ​ສັກ​ຂີ​ພິ​ຍານ​ໃນ​ພິ​ທີເຊັນ​ສັນ​ຍາຮ່ວມ​ມື​ສອງ​ຝ່າຍ 19 ສະ​ບັບ ແລະ​ອອກ​ຖະ​ແຫຼງ​ການ​ຮ່ວມ​ຈີນ-ກຳ​ປູ​ເຈຍ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ