ປະ​ທາ​ນາ​ທິ​ບໍ​ດີອິນ​ໂດ​ເນ​ເຊຍ​ໃຫ້​ຜູ້​ຮັບ​ຜິດ​ຊອບ​ສຳ​ຫຼວດ​ຄວາມ​ໄວ​ປະ​ຕິ​ບັດ​ໂຄງ​ການ​ທາງ​ລົດ​ໄຟ​ຄວາມ​ໄວ​ສູງ "ຈາ​ກາ​ຕາ-ບັນ​ດຸງ"
2018-01-11 16:49:37  cri 
ໜັງ​ສື​ພິມ​ຈາ​ກາ​ຕາ​ພົ​ສ​ສະ​ບັບ​ວັນ​ທີ 10 ມັງ​ກອນ​​ນີ້ລາຍ​ງານ​ວ່າ, ຍ້ອນ​ວ່າ​ໂຄງ​ການ​ທາງ​ລົດ​ໄຟ​ຄວາມ​ໄວ​ສູງ​ຈາ​ກາ​ຕາ-ບັນ​ດຸງ​ບໍ່​ມີ​ຄວາມ​ຄືບ​ໜ້າ, ທ່ານ​ໂຈ​ໂ​ຄ ວິ​ໂດ​ໂດ, ປະ​ທາ​ນາ​ທິ​ບໍ​ດີ​ອິນ​ໂດ​ເນ​ເຊຍ​ໄດ້​ສັ່ງ​ໃຫ້​ທ່ານ​ລຸ​ຮຸດ ປັນ​ໄຈຕັນ ລັດ​ຖະ​ມົນ​ຕີ​ກະ​ຊວງ​ວຽກ​ງານ​ທະ​ເລ, ທ່ານ​ນາງ​ຣິ​ນິ ເຊ​ມະ​ໂນ ລັດ​ຖະ​ມົນ​ຕີ​ກະ​ຊວງ​ລັດວິ​ສາ​ຫະ​ກິດ​ແລະ​ທ່ານ​ໂທ​ມັ​ສ ປະ​ທານ​ອົງ​ການ​ປະ​ສານ​ງານ​ການ​ລົງ​ທຶນສຳ​ຫຼວດ​ແລະ​ປະ​ເມີນຕໍ່​ໂຄງ​ການ​ດັ່ງ​ກ່າວ.

ທ່ານ​​ລຸ​ຮຸດ​ກ່າວ​ວ່າ, ສາ​ເຫດ​ທີ່​ພາ​ໃຫ້​ໂຄງ​ການ​ບໍ່​ມີ​ຄວາມ​ຄືບ​ໜ້າ​ບໍ່​ແມ່ນ​​ຍ້ອນ​ການ​ລະ​ດົມ​ທຶນ​ມີ​ບັນ​ຫາ, ໃນ​ຖາ​ນະ​ເປັນ​ນັກ​ລົງ​ທຶນ​ຕົ້ນ​ຕໍ​ຂອງ​ໂຄງ​ການ​ດັ່ງ​ກ່າວ, ຈີນ​ໄດ້​ປະ​ຕິ​ບັດ​ຕາມ​ສັນ​ຍາ​ທີ່​ລັດ​ຖະ​ບານ​ສອງ​ປະ​ເທດ​ລົງ​ນາມ. "ບັນ​ຫາ​ຕົ້ນ​ຕໍ​ແມ່ນ​ຢູ່​ພາຍ​ໃນ​ພວກ​ເຮົາ​ເອງ", ທ່ານ​ລຸ​ຮຸດ​ກ່າວ​ເນັ້ນ​ວ່າ, ຈະ​ປະ​ຕິ​ບັດ​ຕາມ​ຄວາມ​ຮຽກ​ຮ້ອງ​ຂອງ​ປະ​ທາ​ນາ​ທິ​ບໍ​ດີ, ສຳ​ເລັດ​ການ​ສຳ​ຫຼວດ​ແລະ​ການ​ປະ​ເມີນ​ຕໍ່​ໂຄງ​ການ​ໃນ​ໄລ​ຍະ​ໜຶ່ງ​ເດືອນ. ທ່ານ​ລຸ​ຮຸດ ກ່າວ​ຕື່ມ​ວ່າ, ທ່ານ​ໂຈ​ໂ​ຄ​ຫວັງ​ວ່າ​ສາ​ມາດ​ແກ້​ໄຂ​ບັນ​ຫາ​ທີ່​ຜະ​ເຊີນ​ໜ້າ​ໂດຍ​ໄວ, ເຮັດ​ໃຫ້​ໂຄງ​ການ​ດັ່ງ​ກ່າວ​ສາ​ມາດ​ດຳ​ເນີນ​ໄປຈົນ​ສຳ​ເລັດ.

ໂຄງ​ການ​ທາງ​ລົດ​ໄຟ​ຄວາມ​ໄວ​ສູງ​ຈາ​ກາ​ຕາ-ບັນ​ດຸງ​ແມ່ນ​ໂຄງ​ການ​ຮ່ວມ​ມື​ທີ່​ລົງ​ນາມ​ໂດຍ​ມີປະ​ມຸກ​ລັດ​ສອງ​ປະ​ເທດ​ຈີນ​ອິນ​ໂດ​ເນ​ເຊຍ​ເປັນ​ສັກ​ຂີ​ພິ​ຍານ, ວາງ​ແຜນ​ຈະ​ສ້າງ​ສຳ​ເລັດ​ແລະນຳ​ໃຊ້ໃນ​ປີ 2019.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ