ນາ​ຍົກ​ຈີນ ກຳ​ປູ​ເຈຍ ຮ່ວມ​ເປີດ​ພິທີ​ໂຄງການ​ແພດ​ຈີນ​ປິ່ນປົວ​ພະຍາດຫົວ​ໃຈ​ໂດຍ​ບໍ່​ເສຍ​ຄ່າ
2018-01-11 21:48:01  cri 
​ຕອນ​ເຊົ້າ​ວັນ​ທີ 11 ມັງກອນນີ້, ທ່ານ​ຫຼີ​ເຄີ້ສຽງ ນາຍົກລັດຖະມົນຕີຈີນ ​ແລະ​ທ່ານຮຸນ​ແຊນ ນາ​ຍົກ​ລັດຖະມົນຕີ​ກຳປູ​ເຈຍ​​ໄດ້​ຮ່ວມ​ເປີດ​ໂຄງການ "ການ​ເຄື່ອນ​ໄຫວ​ເພື່ອ​ຖະນຸຖຸະໜອມຫົວ​ໃຈ" ທີ່​ແພດ​ຈີນຜ່າຕັດ​ໃຫ້​ເດັກນ້ອຍ​ກຳປູ​ເຈຍ​ທີ່​ເປັນ​ພະຍາດຫົວ​ໃຈ​​ມາ​ແຕ່​ເກີດ​ໂດຍບໍ່​ເສຍ​ຄ່າ ​ແລະ​ພິທີ​ເປີດໂຄງການ​ກໍ່ສ້າງ​ໂຮງໝໍ​ມິດຕະພາບ​ຈີນ-ກຳປູ​ເຈຍ​ກົກ​ສະມະ ​ແລະ​ໂຮງໝໍ​ແຂວງ​ເຕິ​ບົມ​ໂຄມ.

ກ່ອນ​ອື່ນ, ຜູ້ນຳ​ສອງ​ປະ​ເທດ​ໄດ້​​ເບິ່ງ​ວິ​ດີ​ໂອ​ແນ​ະນຳ​ໂຄງການ "​ເຄື່ອນ​ໄຫວ​ເພື່ອ​ຖະນຸຖະໜອມ​ຫົວ​ໃຈ". ລັດຖະບານ​ຈີນ​ຈະ​ປະຕິບັດ​ໂຄງການ​ດັ່ງກ່າວໂດຍຜ່າ​ຕັດ​ໃຫ້​​ເດັກນ້ອຍກຳປູ​ເຈຍທີ່​ເປັນພະຍາດຫົວ​ໃຈ​ມາ​ແຕ່​ເກີດຈຳນວນ 100 ຄົນ​ໂດຍ​ບໍ່​​ເສຍ​ຄ່າ​ເປັນ​ເວລາ 3 ປີ ​ແລະ​ຈະ​ສົ່ງ​ຊ່ຽວຊານ​ຈີນ​ໄປ​ຊ່ວຍ​ຍົກ​ລະດັບ​ພະນັກງານ​ແພດ​ໝໍ​ກຳ​ປູ​ເຈຍ ​ແລະ​ເປີດ​ໂອກາດ​ໃຫ້​ແພດ​ໝໍ​ກຳປູ​ເຈຍ​ໄປ​ຝຶກ​ອົບຮົມ​ຢູ່​ຈີນ ​ແລະ​ອື່ນໆ. ນອກນີ້, ຈີ​ນຍັງ​ຈະ​ຮ່ວມ​ມື​ກັບ​ກຳ​ປູ​ເຈຍ​ໃນ​ການກວດກາ​ປ້ອງ​ກັນ ​ແລະ​ຄ​ວບຄຸມພະຍາດ​ຫຼອດ​ເລືອດ​​ຫົວ​ໃຈ​ໃນ​ໄລຍະ​ຕົ້ນ ​ແລະ​ການ​ຄົ້ນຄວ້າ​ອື່ນໆ.

​ໃນ​ພິທີ​ຄັ້ງ​ນີ້, ຜູ້​ນຳ​ສອງ​ປະ​ເທດ​ຍັງ​ໄດ້​ເປີດ​​ໂຄງການ​​ໂຮງໝໍ​ມິດຕະພາບ​ຈີນ-ກຳປູ​ເຈຍ​ກົກ​ສະມະ ​ແລະ​ໂຮງໝໍ​ແຂວງ​ເຕິ​ບົມ​ໂຄມ. ​ໂດຍ​ແມ່ນ​ການ​ຊ່ວຍ​ເຫຼືອ​ຈາກ​ລັດຖະບານ​ຈີນ ​ເມື່ອ​ສ້າງ​ສຳ​ເລັດ​ແລ້ວຈະກາຍ​ເປັນ​ໂຮງໝໍປິ່ນປົວ​ພະຍາດ​ທົ່ວ​ໄປທີ່​ມີ​ລະດັບ​ການ​ປິ່ນປົວ​ສູງ​ສຸດ ​ແລະ​ມີ​ອຸປະກອນ​ການ​ແພດ​ກ້າວໜ້າທັນ​ສະ​ໄໝ​ທີ່​ສຸດຂອງ​ກຳປູ​ເຈຍ. ​ໃນ​ອະນາຄົດ, ຈີນ ​ແລະ​ກຳ​ປູ​ເຈຍ​ຍັງ​ຈະ​ສືບ​ຕໍ່​​ຮ່ວມ​ມືຍົກ​ລະດັບ​ພະນັກງານ​ການ​ແພດຕື່ມ​ອີກ.

ປີ 2014, ກຳປູ​ເຈຍ​ໄດ້ສ້າງ​ຕັ້ງ​ແຂວງ​ເຕິ​ບົມ​ໂຄມ ​ແລະມີ​​ແຜນ​ຈະ​ຍົກຍ້າຍປະຊາຊົນ 8 ​ແສນ​ຄົນ​ເຂົ້າ​ໄປ​ອາ​ໄສ​ຢູ່​ແຂວງ​ນີ້, ສະ​ນັ້ນ ຈຶ່ງຂາດ​ການບໍລິການ​ທາງ​ການ​ແພດຢ່າງ​ຫຼວງ​ຫຼາຍ. ​ເພື່ອ​ຊ່ວຍ​ເຫຼືອ​ກຳປູ​ເຈຍ​ຍົກ​ສູງ​ລະ​ດັບ​ການ​ປິ່ນປົວ, ຈີນ​ຈະ​ຊ່ວຍ​ກໍ່ສ້າງໂຮງໝໍປິ່ນປົວ​ພະຍາ​ດທົ່ວ​​ໄປທີ່​ມີ 300 ຕຽງ​ຢູ່​ແຂວງ​ເຕິ​ບົມ​ໂຄມ ​ເຊິ່ງຈະ​ສົ່ງ​ຜົນ​ປະ​ໂຫຍ​ດ​ໃຫ້​ປະຊາຊົນ 4 ລ້ານ​ຄົນ​ຢູ່​ແຂວງດັ່ງກ່າວ ກໍ​ຄື​​​ແຂວງ​ອ້ອມ​ຂ້າງ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ