ກອງ​ປະ​ຊຸມ​ຜູ້​ນຳຂອງ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ຄັ້ງ​ທີ 2  ອອກ "ຖະ​ແຫຼງ​ການ​ພະ​ນົມ​ເປັນ"
2018-01-11 16:28:03  cri 
    ກອງ​ປະ​ຊຸມ​ຜູ້​ນຳຂອງ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ຄັ້ງ​ທີ 2  ໄດ້​ຈັດ​ຂຶ້ນ​ຢູ່​ນະ​ຄອນຫຼວ​ງ​ພະ​ນົມ​ເປັນ​ຂອງ​ກຳ​ປູ​ເຈຍ​ໃນ​ວັນ​ທີ 10 ມັງ​ກອນນີ້​ ພາຍ​ໃຕ້​ຫົວ​ຂໍ້​ "ແມ່​ນ້ຳ​ແຫ່ງ​ສັນ​ຕິ​ພາບ​ແລະ​ການ​ພັດ​ທະ​ນາ​ແບບ​ຍືນ​ຍົງ​ຂອງ​ພວກ​ເຮົາ" ໄດ້ອອກ ຖະ​ແຫຼງ​ການ​ພະ​ນົມ​ເປັນ ໂດຍ​ໄດ້​ຊີ້​ທິດ​ທາງ​ການ​ພັດ​ທະ​ນາ​ກົນ​ໄກ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ໃນ 10 ປີ​ຂ້າງ​ໜ້າ.

    ຖະ​ແຫຼງ​ການ​ລະ​ບຸ​ວ່າ, ຜູ້​ນຳ​ທີ່​ຮ່ວມ​ປະ​ຊຸມ​ມີ​ຄວາມ​ເພິ່ງ​ພໍ​ໃຈ​ຕໍ່​ຄວາມ​ຄືບ​ໜ້າ​ຕົວ​ຈິງ​ໃນ 45 ໂຄງ​ການ​ໄລ​ຍະ​ຕົ້ນ​ທີ່​ສະ​ເໜີ​​ໃນ​ກອງ​ປະ​ຊຸມ​ຜູ້​ນຳ​ຄັ້ງ​ທຳ​ອິດ ແລະ 13 ຂໍ້​ລິ​ເລີ່ມ​ທີ່​ຈີນ​ສະ​ເໜີ​ໃນ​ກອງ​ປະ​ຊຸມ​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ຄັ້ງ​ທີ 2, ທັງ​ໄດ້​ຍ້ອງ​ຍໍ​ຊົມ​ເຊີຍ​ສູງ​ຕໍ່​ຈີນ​ທີ່​ໄດ້​ທຳ​ຄວາມ​ພະ​ຍາ​ຍາມ​ໃນ​ການ​ສ້າງ​ຕັ້ງ​ກອງ​ທຶນ​ສະ​ເພາະ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ແລະ ຊຸກ​ຍູ້​ການ​ແລກ​ປ່ຽນ​ແລະ​ການ​ຮ່ວມ​ມື​ລະ​ຫວ່າງ​ປະ​ເທດ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ.

    ຖະ​ແຫຼງ​ການ​ລະ​ບຸ​ວ່າ, ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ຄວນ​ປະ​ຕິ​ບັດ​ຕາມ​ຈິດ​ໃຈ​ເປີດ​ປະ​ຕູ​ແລະ​ກວມ​ລວມ, ທັງ​ເຊື່ອມ​ຕໍ່​ກັບ​ຂົງ​ເຂດ​ບຸ​ລິ​ມະ​ສິດ​ໃນ​ການ​ສ້າງ​ປະ​ຊາ​ຄົມ​ອາ​ຊຽນ ແລະ ການ​ຮ່ວມ​ມື​ຈີນ-ອາ​ຊຽນຢ່າງ​ຮອບ​ດ້ານ, ຕ່າງ​ຊ່ວຍ​ຊູ​ຍູ້​ໜູນ ແລະ​ພັດ​ທະ​ນາ​ຢ່າງ​ປະ​ສານ​ກົມ​ກຽວ​ກັບ​ກົນ​ໄກ​ອະ​ນຸ​ພາກ​ພື້ນ​ທີ່​ມີ​ຢູ່​ໃນ​ປັດ​ຈຸ​ບັນ, ຜ່ານ​ຈາກ​ການ​ຮ່ວມ​ມື​ກັບ "ແຜນ​ການ​ລວມວ່າ​ດ້ວຍ​ການ​ເຊື່ອມ​ຈອດ​ກັນ​ຂອງ​ອາ​ຊຽນ 2025", ຂໍ້​ລິ​ເລີ່ມ​ກ່ຽວ​ກັບ​ການ​ຫັນ​ເປັນ​ເອ​ກະ​ພົບ​ດຽວ​ຂອງ​ອາ​ຊຽນ, ຂໍ້​ລິ​ເລີ່ມ "ໜຶ່ງ​ແລວ​ທາງ​ໜຶ່ງ​ເສັ້ນ​ທາງ" ແລະ​ຍຸດ​ທະ​ສາດ​ການ​ພັດ​ທະ​ນາ​ຂອງ​ບັນ​ດ​ປະ​ເທດ ເພື່ອ​ບັນ​ລຸ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍດ.
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ