ເສີມ​ສ້າງ​ປ​ະ​ຊາ​ຄົມ​ຮ່ວມ​ຊາ​ຕາ​ກຳ​ດ້ວຍ​ຮູບ​ແບບ​ການ​ຮ່ວມ​ມື​ພາກ​ພື້ນ​ໃໝ່
2018-01-12 14:40:05  cri 
ກົນ​ໄກ​​ການຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ທີ່​ເລີ່ມ​ຂຶ້ນ​ໃນ​ເດືອນ​ມີ​ນາ​ປີ 2016 ໃກ້​ຈະ​ຄົບ​ຮອບ 2 ປີ​ແລ້ວ. ເພື່ອ​ຊຸກ​ຍູ້​ໃຫ້​ການ​ຮ່ວມ​ມື​​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ໃຫ້​ຂະ​ຫຍາຍສູ່​ລວງ​ເລິກ, ຜູ້​ນຳ 6 ປະ​ເທດ​ໄດ້ຈັດ​ກອງ​ປະ​ຊຸມ​ສຸດຍອດ​ການ​ຮ່ວມ​ມື​ແມ່​ນ້ຳ​ລ້າ���​ຊ້າງ-ແມ່​ນ້ຳ​ຂອງ​ຄັ້ງ​ທີ 2 ຢູ່​ນະ​ຄອນຫຼວ​ງ​ພະ​ນົມ​ເປັນ​ປະ​ເທດ​ກຳ​ປູ​ເຈຍ​. ຂະ​ນະ​ທີ່​ຄົນ​ທັງຫຼາຍ​ຄອງ​ຄອຍ "ແຜນ​ການ​ປະ​ຕິ​ບັດ​ງານ 5 ປີ​​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ" ແລະໂຄງ​ການ​ຮ່ວມ​ມື​​ອີກງວດໃໝ່​ໃນ​ຂົງ​ເຂດ​ນີ້​ໄດ້​ນຳ​ພາ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ກ້າວ​ເຂົ້າ​ສູ່​ໄລ​ຍະ​ເຕີບ​ໂຕ​ຢ່າງວ່ອງ​ໄວ, ຮູບ​ແບບ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ທີ່​ມີ​ຈຸດ​ພິ​ເສດ​ມີ​ປະ​ສິດ​ທິ​ພາບ​ສູງ, ຕິດ​ແທດ​ຕົວ​ຈິງ, ຖື​ເອົາ​ໂຄງ​ການ​ເປັນຫຼັກ ແລະ ເນັ້ນ​ໃສ່​ຂົງ​ເຂດ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ ກໍ​ໄດ້​ເປັນ​ຮູບ​ປະ​ທຳ​ຂຶ້ນ​ເຊັ່ນ​ດຽວ​ກັນ.

ການ​ຮ່ວມ​ມື​ອາ​ຊີ​ຕາ​ເວັນ​ອອກ​ໄດ້​ເລີ່ມ​ຂຶ້ນ​ພາຍຫຼັງ​ສົງ​ຄາມ​ເຢັນ ແລະ ໄດ້​ພັດ​ທະ​ນາ​ໄວ​ຂຶ້ນ​ພາຍຫຼັງ​ວິ​ກິດ​ການ​ການ​ເງິນ​ອາ​ຊີ​ປີ 1997. ມາ​ຮອດ​ປັດ​ຈຸ​ບັນ, ຂະ​ບວນການ​ເຊື່ອມ​ໂຍງ​ອາ​ຊີ​ຕາ​ເວັນ​ອອກ​ຍັງ​ປະ​ສົບຫຼາຍ​ບັນ​ຫາ, ເຊັ່ນ: ການ​ສ້າງ​ເຂດ​ການ​ຄ້າ​ເສ​ລີ ກໍ​ຄື ການ​ສ້າງ​ປະ​ຊາ​ຄົມ​ອາ​ຊຽນ ລ້ວນ​ແຕ່​ບໍ່​ສາ​ມາດ​ແກ້​ໄຂ​ຄວາມ​ແຕກ​ໂຕ​ນ​ກັນ​ດ້ານ​ການ​ພັດ​ທະ​ນາ​ລະ​ຫວ່າງ​ສະ​ມາ​ຊິກ​ເກົ່າ ກັບ ສະ​ມາ​ຊິກ​ໃໝ່​ຂອງ​ອາ​ຊຽນ​ຢ່າງ​ບັງ​ເກີດ​ຜົນ, ​ທັງ​ບໍ່​ສາ​ມາດ​ແກ້​ໄຂ​ບັນ​ຫາການ​ເຊື່ອມ​ຈອດ​​ພື້ນ​ຖານ​ໂຄງ​ລ່າງ ເຫຼົ່າ​ນີ້​ເປັນ​ຕົ້ນ. ຄຽງ​ຄູ່​ກັບ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ຂະ​ຫຍາຍ​​ສູ່​ລວງ​ເລິກ, ຮູບ​ແບບ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ພວມ​ກາຍ​ເປັນ​ເວ​ທີ​ໃໝ່​ ທີ່​ສອດ​ຄ່ອງ​ກັບ​ຈຸດ​ພິ​ເສດ​ຂອງ​ປະ​ເທດ​ພວມ​ພັດ​ທະ​ນາ ເພື່ອ​ຊຸກ​ຍູ້​ຂະ​ບວນ​ການ​ເຊື່ອມ​ໂຍງ​ຂອງ​ພາກ​ພື້ນ ແລະ ການ​​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ.

ຈາກ​ການ​ເນັ້ນ​​ປະ​ສິດ​ທິ​ຜົນ​ມາ​ເປັນ​ການ​ເນັ້ນ​​ປະ​ສິດ​ທິ​ພາບ

ມາດ​ຕະ​ການ​ທີ່​ຊຸກ​ຍູ້​ໃຫ້​ການ​ຮ່ວມ​ມື​ພາກ​ພື້ນ​ມີ​ຄວາມ​ເສ​ລີ ແລະ ​ພັດ​ທະ​ນາ​ຢ່າງສະ​ດວກກວ່າ​ເກົ່າ ​ແມ່ນ​ສົນ​ໃຈ​ເຖິງ​ຜົນ​ປະ​ໂຫຍດ​ຂອງວິ​ສາ​ຫະ​ກິດ​ທີ່​ມີ​ສ່ວນ​ຮ່ວມ​ຕົ້ນ​ຕໍ​ໃນ​ຕະຫຼາດ, ​ການມ້າງ​ກຳ​ແພງ​ດ້ານ​ລະ​ບຽບ​ການ​ປະ​ເພດ​ຕ່າງໆ ​ກໍເພື່ອ​ເຮັດ​ໃຫ້​ຕະຫຼາດ​ເສີ​ມ​ຂະ​ຫຍາຍ​ບົດ​ບາດ​ນຳ​ພາ ແລະ ດຶງ​ດູດ​ວິ​ສາ​ຫະ​ກິດ​ເຂົ້າ​ຮ່ວມ​ດຳ​ເນີນ​ທຸ​ລະ​ກິດ​ໃນ​ພາກ​ພື້ນ. ແຕ່​​ການ​ຕອບ​ຮັບ​ຈາກຕະຫຼາດ​ບາງ​ເທື່ອ​ຈະ​ຊ້າກວ່າ, ເພື່​ອ​ແກ້​ໄຂ​ບັນ​ຫາ​ດັ່ງ​ກ່າວ, ກາ​ນ​ຮ່ວມ​ມື​ພາຍ​ໃນ​ອາ​ຊຽນ ກໍ​ຄື ການ​ຮ່ວມ​ມື​ຈີນ-ອາ​ຊຽນ​ລ້ວນ​ແຕ່​ໄດ້ວາງ​ແຜນ​ໃຫ້​ມີ​ຜົນ​ເກັບ​ກ່ຽວ​​ໃນ​ໄລ​ຍະຕົ້ນ, ເຮັດ​ໃຫ້​ບັນ​ດາ​ຝ່າຍ​ຈະ​ໄດ້​ຮັບ​ຜົນ​ປະ​ໂຫຍດ​ໂດຍ​ໄວ​ໃນ​ການ​ຮ່ວມ​ມື ແລະ ຍົກ​ສູງ​ຄວາມ​ຫ້າວ​ຫັນ​ໃນ​ການ​ເຂົ້າ​ຮ່ວມ​ການ​ຮ່ວມ​ມື.

ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ໄດ້​ເນັ້ນ​​ປະ​ສິດ​ທິ​ພາບ ແລະ ຕິດ​ແທດ​ຕົວ​ຈິງ ເຊິ່ງ​ໄດ້​ສ້າງ​ຄວາມ​ໄວ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ແບບ "ທຸກ​ມື້​ມີ​ຄວາມ​ຄືບ​ໜ້າ, ທຸກ​ເດືອນ​ມີ​ຜົນ​ສຳ​ເລັດ ແລະ ທຸກ​ປີ​ໄດ້​ກ້າວ​ຂຶ້ນ​ສູ່​ລະ​ດັບ​ໃໝ່" ເຊິ່ງ​ໝາຍ​ຄວາມ​ວ່າ ໄດ້​ຊຸກ​ຍູ້​ການ​ຮ່ວມ​ມື​ກັນ​ຢ່າງ​ບໍ່​ຢຸດ​ຢັ້ງ​ຈາກ​ດ້ານ​ມະ​ຫາ​ພາກ ແລະ ຈຸລະ​ພາກ, ເຮັດ​ໃຫ້​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ເຕັມ​ໄປ​ດ້ວຍ​ຄວາມ​ມີຊີ​ວິດ​ຊີ​ວາ​ຕະຫຼອດ​ເວ​ລາ, ບັນ​ດາ​ຝ່າຍ​ໃນ​ການ​ຮ່ວມ​ມື​ບໍ່​ພຽງ​ແຕ່​ໄດ້​ເຫັນ​ເຖິງ​ຄວາມ​ມຸ່ງ​ຫວັງ​ທີ່​ດີ​ເທົ່າ​ນັ້ນ, ຍັງ​ໄດ້​ຮັບ​ຜົນ​ປະ​ໂຫຍດ​ຕົວ​ຈິງ​ພ້ອມ​ກັນ​ອີກ​ດ້ວຍ.

ຈາກ​ການ​ວາງ​ລະ​ບຽບ​ການ​ກາຍເປັນ​ການ​ຊຸກ​ຍູ້​ໂຄງ​ການ

ຄວາມ​ພະ​ຍາ​ຍາມ​ໃນ​ການ​ຮ່ວມ​ມື​ພາກ​ພື້ນ ສຸມ​ໃສ່​ການ​ກຳ​ນົດ​ກະ​ຕິ​ກາ​ການ​ຄ້າ​ການ​ລົງ​ທຶນ​ໃນ​ພາ​ກ​ພື້ນ ເພື່ອ​ນຳ​ພາ ແລະ ກະ​ຕຸກ​ຊຸກ​ຍູ້ດ້ານ​ເສດ​ຖະ​ກິດ​ການ​ຄ້າ ທັງ​ເຮັດ​ໃຫ້​​ເປັນ​ລະ​ບຽບ​ແບບ​ແຜນ​ຄືນ​ໃໝ່. ສ່ວນ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ທີ່​ມີ​ຢູ່​ບົນ​ພື້ນ​ຖານ​ສະ​ພາບ​ຕົວ​ຈິງ​ຂອງ​ປະ​ເທດ​ຕ່າງໆ​ຢູ່​ແຫຼມ​ອິນ​ດູ​ຈີນນັ້ນ ໄດ້​​ປະ​ຕິ​ບັດຈາກ​ໂຄງ​ການ​ລະ​ອຽດ, ໄດ້​ເຂົ້າ​ຮ່ວມ​ການ​ສ້າງ​ພື້ນ​ຖານ​ໂຄງ​ລ່າງ​ແລະ​ການ​ຂຸດ​ຄົ້ນ​ຊັບ​ພະ​ຍາ​ກອນ​ຂອງ​ບັນ​ດາ​ປະ​ເທດ​ໃນ​ພາກ​ພື້ນ​ໂດຍ​ກົງ​ດ້ວຍ​ຮູບ​ການ​ທີ່​ຕັ້ງ​ໜ້າກວ່າ​ເກົ່າ.

ທີ່​ຈິງ​ແລ້ວ, ນີ້​ແມ່ນ​ການ​ປ່ຽນ​ແປງ​ຈາກ​ການ​ເອົາ​ໃຈ​ໃສ່​ການ​ຄ້າ​ຫັນ​ໄປ​ສູ່​ການ​ລົງ​ທຶນ​ໃນ​ດ້ານ​ການ​ຮ່ວມ​ມື​ພາກ​ພື້ນ. ຕາມ​ຂ່າວ​ລາຍ​ງານ​ວ່າ, 45 ໂຄງ​ການ​ໄລ​ຍະ​ຕົ້ນ​ທີ່​ຖືກ​ກຳ​ນົດ​ໃນ​ກອງ​ປະ​ຊຸມ​ຜູ້​ນຳ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ຄັ້ງ​ທຳ​ອິດ ແລະ  13 ຂໍ້​ລິ​ເລີ່ມທີ່​ຈະ​ສະ​ເໜີ​ໃນ​ກອງ​ປະ​ຊຸມ​ລັດ​ຖະ​ມົນ​ຕີ​ການ​ຕ່າງ​ປະ​ເທດ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ຄັ້ງ​ທີ 2 ໄດ້​ດຳ​ເນີນ​ຕາມ​ແຜນ​ການ​ໃນ​ປັດ​ຈຸ​ບັນ ແລະ​ໄດ້​ສຳ​ເລັດ​ສ່ວນ​ໜຶ່ງ. ຕົວ​ຢ່າງ​ຄື: ໃນ​ຂົງ​ເຂດ​ກະ​ສິ​ກຳ, ນັບ​ແຕ່​ເລີ່ມ​ປະ​ຕິ​ບັດ​ກົນ​ໄກ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ເປັນ​ຕົ້ນ​ມາ, ກະ​ຊວງ​ກະ​ສິ​ກຳ​ຈີນ ໄດ້​ເຈາະ​ຈົງ​ປະ​ຕິ​ບັດ 4 ໂຄງ​ການ​ໄລ​ຍະ​ຕົ້ນ ເຊິ່ງ​ພົວ​ພັນ​ເຖິງ​ການ​ປົກ​ປັກ​ຮັກ​ສາ​ຊັບ​ພະ​ຍາ​ກອນ​ການ​ປະ​ມົງ​ແລະ​ທຳ​ມະ​ຊາດ, ການ​ເຕືອນ​ໄພ​ແລະ​ປ້ອງ​ກັນ​ສັດ​ຕູ​ພືດ​ທຳ​ລາຍ​ເຂົ້າ, ການ​ຜະ​ລິດ​ໝາກ​ໄມ້​ແລະ​ຜັກ​ພ້ອມ​ດ້ວຍ​ການ​ຍົກ​ສູງ​ຄຸນ​ນະ​ພາບ, ການ​ຄົ້ນ​ຄວ້າ​ແລະ​ພັດ​ທະ​ນາ​ພືດ​ປະ​ເພດ​ຖົ່ວ ແລະ ອື່ນໆ, ໂດຍ​ໄດ້​ຍົກ​ສູ​ງ​ລະ​ດັບ​ວິ​ທະ​ຍາ​ສາດ​ເຕັກ​ນິກ​ດ້ານ​ກະ​ສິ​ກຳ​ຂອງ 5 ປະ​ເທດ​ແມ່​ນ້ຳ​ຂອງ.

ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ທີ່​ຫັນ​ໄປ​ສູ່​ການ​ກໍ່​ສ້າງ​ໂຄງ​ການນັ້ນ ຍິ່ງ​ສາ​ມາດ​ສະ​ແດງ​ໃຫ້​ເຫັນ​ເຖິງ​ທ່າ​ແຮງ​ຂອງ​ກົນ​ໄກ​ຄື "ນຳ​ພາ​ໂດຍ​ຜູ້​ນຳ, ກວມ​ເອົາທົ່ວ​ທຸກ​ທິດ​ຢ່າງ​ຮອບ​ດ້ານ ແລະ​ທຸກ​ພາກ​ສ່ວນ​ເຂົ້າ​ຮ່ວມ". ເວົ້າ​ສຳ​ລັບ​ພາກ​ພື້ນ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ທີ່​ການ​ພັດ​ທະ​ນາ​ເສດ​ຖະ​ກິດ​ອ່າວຫຼ້າຫຼັງ ໂດຍ​ສະ​ເພາະ​ຍັງ​ອ່ອນ​ແອ​ໃນ​ດ້ານ​ພື້ນ​ຖານ​ໂຄງ​ລ່າງ​ແລ້ວ, ການກໍ່​ສ້າງ​ໂຄງ​ການ ມີ​ລັກ​ສະ​ນະ​ແນ​ໃສ່​ຍິ່ງຫຼາຍ, ຍິ່ງ​ເໝາະ​ກັບ​ການ​ແກ້​ໄຂ​ທຸກໆ​ບັນ​ຫາ​ຕາມ​ລຳ​ດັບ​ໃນ​ການ​ພັດ​ທະ​ນາ​ພາຍ​ໃຕ້​ການ​ນຳ​ພາ​ຂອງ​ຜູ້​ນຳ ເພື່ອ​ໄດ້​ຮັບ​ປະ​ສິດ​ທິ​ຜົນ​ຕົວ​ຈິງ.
 
ຈາກ​ການ​ສະ​ແຫວງ​ຫາ​ການ​ຫັນ​ເປັນ​ເອ​ກະ​ພົບ​ດຽວ​ຂອງ​ພາ​ກ​ພື້ນ ຫັນ​ເປັນ​ປະ​ຊາ​ຄົມ​ຮ່ວມ​ຊາ​ຕາ​ກຳ
 
ທຳ​ອິດ, ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ກໍ​ໄດ້​ສະ​ເໜີ​ຄຳ​ນິ​ຍາມ "ປະ​ຊາ​ຄົມ​ຮ່ວມ​ຊາ​ຕາ​ກຳ", ໂດຍ​ເອົາ​ໃຈ​ໃສ່​ລະ​ດັບ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໂດຍ​ກົງ ແລະ​ເນັ້ນ​ໃສ່​ການ​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ເປັນ​ວຽກ​ງານ​ບຸ​ລິ​ມະ​ສິດ. ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ໄດ້​ກຳ​ນົດ​ວ່າ, ຄວາມ​ໝັ້ນ​ຄົງ​ດ້ານ​ການ​ເມືອງ, ເສດ​ຖະ​ກິດ​ແລະການ​ພັດ​ທະ​ນາແບບ​ຍືນ​ຍົງ ແລະ ການ​ຮ່ວມ​ມື​ດ້ານ​ວັດ​ທະ​ນະ​ທຳ-ສັງ​ຄົມ ເປັນ 3 ເສົາ​ຄ້ຳ​ໃຫຍ່​ດ້ານ​ການ​ຮ່ວມ​ມື, ສ່ວນ​ການ​ເຊື່ອມ​ຈອດ​ກັນ, ການ​ຮ່ວມ​ມື​ດ້ານ​ຄວາມ​ສາ​ມາດ​ການ​ຜະ​ລິດ, ເສ​ດ​ຖະ​ກິດ​ຂ້າມ​ຊາຍ​ແດນ, ການ​ຮ່ວມ​ມື​ໃນ​ດ້ານ​ຊັບ​ພະ​ກອນ​ນ້ຳ, ກະ​ສິ​ກຳ ແລະ ການຫຼຸດ​ຜ່ອນ​ຄວາມ​ທຸກ​ຍາກ ໄດ້​ຖືກ​ກຳ​ນົດ​ເປັນ 5 ຂົງ​ເຂດ​ບຸ​ລິ​ມະ​ສິດ​ໃນ​ການ​ຮ່ວມ​ມື.

ພວກ​ເຮົາ​ໄດ້​ສັງ​ເກດ​ເຫັນ​ວ່າ, ບໍ່​ພຽງ​ແຕ່​ການ​ເຊື່ອມ​ຈອດ​ກັນ​ທີ່​ເປັນ​ຂົງ​ເຂດ​ໃໝ່​ໃນ​ການ​ຮ່ວມ​ມື​ພາກ​ພື້ນ ຖືກ​ກຳ​ນົດ​ເປັນ​ຂົງ​ເຂດ​ບຸ​ລິ​ມະ​ສິດ​ໃນ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ເທົ່າ​ນັ້ນ, ບັນ​ຫາຫຼຸດ​ຜ່ອນ​ຄວາມ​ທຸກ​ຍາກ ກໍ​ໄດ້​ຮັບການ​ເອົາ​ໃຈ​ໃສ່​ເຊັ່ນ​ດຽວ​ກັນ.  ບົດ​ຮຽນ​ຢັ້ງ​ຢືນ​ໃຫ້​ເຫັນ​ວ່າ, ການ​ຊຸກ​ຍູ້​ພາກ​ພື້ນ​ຫັນ​ເປັນ​ເອ​ກະ​ພົບ​ດຽວ ກໍ​ແມ່ນ​ຂະ​ບວນ​ການ​ທີ່​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ໃຫ້​ດີ​ຂຶ້ນ​ເປັນ​ເວ​ລາ​ຍາວ​ນານ, ແຕ່​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ໄດ້​ຈັດ​ເອົາ​ການ​ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ປະ​ຊ​າ​ຊົນ ໄວ້​ຢູ່​ບ່ອນ​ທີ່​ພົ້ນ​ເດັ່ນ​ທີ່​ສຸດ ແລະ​ຕັ້ງ​ເປົ້າ​ໝາຍ​ຂອງ​ການ​ຮ່ວມ​ມື​ຄື​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ ແລະ​ໄດ້​ທຳ​ຄວາມ​ພະ​ຍ​າ​ຍາມ​ໂດຍ​ກົງ​ທີ່​ສຸດ​ເພື່ອ​ເລື່ອງນີ້, ຈຶ່ງ​ເຮັດ​ໃຫ້​ບັນ​ດາ​ປະ​ເທດ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ມີ​ຄວາມ​ຮູ້​ສຶກ​ຕໍ່​ຄວາມ​ສະ​ໜິດ​ແໜ້ນ​ທີ່ "ດື່ມ​ນ້ຳ​ສາຍ​ດຽວ​ກັນ" ແບບນັ້ນ​ຢ່າງ​ເລິກ​ເຊິ່ງກວ່າ​ເກົ່າ.

ເຊື່ອ​ວ່າ, ເບົ້າ​ແບບ​ການ​ຮ່ວມ​ມື​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ທີ່​ຖື​ການ​ສ້າງ​ປະ​ຊາ​ຄົມ​ຮ່ວມ​ຊາ​ຕາ​ກຳ​ເປັນ​ເປົ້າ​ໝາຍ, ຈັດ​ເອົາ​ການ​ປັບ​ປຸງ​ຊີ​ວິດ​ການ​ເປັນ​ຢູ່​ເປັນວຽກ​ງານ​ອັນ​ດັບ​ໜຶ່ງ ແລະ ຊຸກ​ຍູ້​ການ​ສ້າງ​ໂຄງ​ການ​ຢ່າງ​ແທ້​ຈິງນັ້ນ ຈະ​ກາຍ​ເປັນ​ແບບ​ຢ່າງ​ໃໝ່​ໃນ​ການ​ຮ່ວມ​ມື​ລະ​ຫວ່າງ​ປະ​ເທດ​ພວມ​ພັດ​ທະ​ນາ ແລະ​ຈະ​ຊຸກ​ຍູ້​ພາກ​ພື້ນ​ກ້າວ​ໄປ​ສູ່​ປະ​ຊາ​ຄົມ​ຮ່ວມ​ຊາ​ຕາ​ກຳ​ໃນ​ທີ່​ສຸດ.
 
ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ