ຕອນຄ່ຳວັນທີ 12 ມັງກອນນີ້, ກະຊວງການຕ່າງປະເທດຈີນແລະອຳນາດການປົກຄອງນະຄອນຫຼວງປັກກິ່ງໄດ້ຮ່ວມກັນຈັດງານລ້ຽງນັກຂ່າວຕ່າງປະເທດປະຈຳຈີນຢູ່ຫໍພິພິທະພັນນະຄອນຫຼວງໂອກາດປີໃໝ່ 2018 ວຽນມາເຖິງ.
ທ່ານສິງກ່າງ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນໄດ້ກ່າວປາໄສວ່າ, ປີ 2018 ແມ່ນປີທຳອິດໃນການຜັນຂະຫຍາຍຈິດໃຈກອງປະຊຸມໃຫຍ່ຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ຢ່າງຮອບດ້ານ, ແລະກໍແມ່ນຈີນປະຕິຮູບເປີດປະຕູສູ່ພາຍນອກຄົບຮອບ 40 ປີ. ແລະໃນປີນີ້, ຈີນຈະຈັດກອງປະຊຸມປະຈຳປີຂອງເວທີປຶກສາຫາລືອາຊີໂປອາວ, ກອງປະຊຸມສຸດຍອດອົງການຮ່ວມມືຊຽງໄຮຢູ່ນະຄອນຊິງດາວ, ກອງປະຊຸມສຸດຍອດເວທີປຶກສາຫາລືການຮ່ວມມືຈີນ-ອາຟຣິກາຢູ່ນະຄອນຫຼວງປັກກິ່ງ, ງານວາງສະແດງສິນຄ້ານຳເຂົ້າສາກົນຈີນຄັ້ງທຳອິດແລະອື່ນໆ.
ນັກຂ່າວຕ່າງປະເທດປະຈຳຈີນແມ່ນຜູ້ໄດ້ຮູ້ໄດ້ເຫັນຂະບວນການພັດທະນາຂອງຈີນດ້ວຍຕົນເອງ, ກໍແມ່ນຜູ້ລາຍງານຂ່າວກ່ຽວກັບຈີນຕໍ່ໂລກ. ຈີນສືບຕໍ່ຍິນດີຕ້ອນຮັບນັກຂ່າວຕ່າງປະເທດລາຍງານຂ່າວກ່ຽວກັບປະເທດຈີນຢ່າງທ່ຽງທຳແລະພາວະວິໄສ, ຮ່ວມກັນເປັນສັກຂີພິຍານຕໍ່ການພັດທະນາຂອງຈີນໃນຍຸກໃໝ່ແລະຄວາມໝາຍຂອງການພັດທະນາຂອງຈີນທີ່ມີຕໍ່ທົ່ວໂລກ.
ນັກຂ່າວຕ່າງປະເທດປະຈຳຈີນ, ທູຕານຸທູດຕ່າງປະເທດປະຈຳຈີນ, ເຈົ້າໜ້າທີ່ແລະຜູ້ຮັບຜິດຊອບຂອງບັນດາກະຊວງ, ອົງການທຽບເທົ່າສູນກາງຈີນແລະພາກສ່ວນທີ່ກ່ຽວຂ້ອງຂອງອຳນາດການປົກຄອງປັກກິ່ງ, ຜູ້ຮັບຜິດຊອບຂອງສື່ມວນຊົນຈີນທີ່ສຳຄັນຕໍປະມານ 600 ຄົນໄດ້ເຂົ້າຮ່ວມງານລ້ຽງດັ່ງກ່າວຢ່າງພ້ອມພຽງ.
 |
