ພິທີມອບໜ້າທີ່ປະເທດປະທານໝູນວຽນຂອງກຸ່ມ 77 ປະເທດໄດ້ຈັດຂຶ້ນຢູ່ສຳນັກງານໃຫຍ່ອົງການສະຫະປະຊາຊາດທີ່ນິວຢອກໃນວັນທີ 12 ມັງກອນນີ້, ໃນໂອກາດກ່າວປາໄສໃນພິທີດັ່ງກ່າວໂດຍຕອບສະໜອງຕາມຄຳເຊີນ, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດກ່າວວ່າ, ໃນຂະນະທີ່ລັດທິຫຼາຍຝ່າຍປະສົບຄວາມຫຍຸ້ງຍາດ, "ກຸ່ມ 77 ປະເທດແລະຈີນ" ແມ່ນເສົາຄ້ຳການເສີມຂະຫຍາຍລັດທິຫຼາຍຝ່າຍ, ແລະໄດ້ເສີມຂະຫຍາຍບົດບາດສຳຄັນໃນດ້ານການຮັບປະກັນໃຫ້ການພັດທະນາເປັນໃຈກາງວຽກງານຂອງອົງການສະຫະປະຊາຊາດ.
ທ່ານກູເຕີເຣັສ ກ່າວຕື່ມວ່າ, ພາຍໃຕ້ສະພາບການທີ່ບາງປະເທດປະລະໜ້າທີ່ຂອງຕົນໃນການຮັບມືກັບການປ່ຽນແປງຂອງດິນຟ້າອາກາດ, ຈີນແລະອິນເດຍເຊິ່ງເປັນກຸ່ມເສດຖະກິດໃຫຍ່ທີ່ສຸດສອງປະເທດໃນ "ກຸ່ມ 77 ປະເທດແລະຈີນ" ໄດ້ເສີມຂະຫຍາຍບົດບາດສຳຄັນເປັນຢ່າງຍິ່ງເພື່ອຮັບປະກັນໃຫ້ໂລກສາມາດຫຼີກເວັ້ນຜົນຮ້າຍຢ້ອນຫຼັງທີ່ເປັນຫາຍະນະຈາກການປ່ຽນແປງຂອງດິນຟ້າອາກາດ.
ຂະນະດຽວກັນນັ້ນທ່ານ ກູເຕີເຣັສ ຍັງໄດ້ຊົມເຊີຍ "ກຸ່ມ 77 ປະເທດແລະຈີນ" ທີ່ເສີມຂະຫຍາຍບົດບາດຢ່າງຕັ້ງໜ້າໃນບັນຫາຊາວອົບພະຍົບແລະການປະຕິຮູບຂອງອົງການສະຫະປະຊາຊາດອີກດ້ວຍ.