ທ່ານມາມຸດ ອັບບັສ ປະທານາທິບໍດີປາແລັສຕິນ ໄດ້ກ່າວຢ້ຳໃນວັນທີ 14 ມັງກອນນີ້ຢູ່ເມືອງຣາມາລາ ວ່າ: ປາແລັສຕິນບໍ່ເຫັນດີໃຫ້ອາເມລິກາເຂົ້າຮ່ວມການໄກ່ເກ່ຍການປະທະກັນລະຫວ່າງປາແລັສຕິນ-ອິສຣາແອນ.
ທ່ານອັບບັສ ໄດ້ກ່າວປາໄສໃນກອງປະຊຸມວິສາມັນຄະນະກຳມະການສູນກາງອົງການປົດປ່ອຍປາແລັສຕິນ ທີ່ຈັດຂຶ້ນຢູ່ເມືອງຣາມາລາ ວ່າ: ປາແລັສຕິນບໍ່ຮັບຮອງໃຫ້ອາເມລິກາເປັນປະເທດໄກ່ເກ່ຍອີກ, ພວກຂ້າພະເຈົ້າຈະບໍ່ຍອມເຮັດໃຫ້ລັດທິເຈົ້າມະຫາອຳນາດຂອງອາເມລິກາສົມຄວາມປາຖະໜາຂອງເຂົາ ພວກຂ້າພະເຈົ້າຈະພິຈາລະນາແຜນຕ່າງໆເພື່ອແກ້ໄຂຄວາມຂັດແຍ້ງລະຫວ່າງປາແລັສຕິນ-ອິສຣາແອນ ແຕ່ບໍ່ລວມທັງອາເມລິກາ.
ທ່ານອັບບັສ ເນັ້ນວ່າ: ເຢຣູຊາເລັມຕາເວັນອອກແມ່ນນະຄອນຫຼວງຂອງປາແລັສຕິນ ປະຊາຊົນປາແລັສຕິນຈະບໍ່ປະລະຢ່າງແນ່ນອນ ແລະກໍຈະບໍ່ເຮັດຄວາມຜິດພາດເໝືອນແຕ່ກ່ອນອີກ, ຂະນະນີ້ແມ່ນເວລາທີ່ສຳຄັນຍິ່ງສຳລັບຊາວປາແລັສຕິນທຸກຄົນຕ້ອງຊ່ວຍກັນປົກປັກຮັກສານະຄອນຫຼວງຂອງຕົນທັນທີແລະເດັດຂາດ.